Ádilet mınıstrligi zań jobalarynyń sapasyn jaqsartý úshin túbegeıli sharalar qabyldaýy qajet - Asqar Mamın
«Ádilet mınıstrligi Zań jobalaý qyzmeti máseleleri jónindegi vedomstvoaralyq komıssııa múshelerimen birlesip, Úkimettiń zań jobalaý jumystarynyń 2020 jylǵa arnalǵan jospar jobasyn ázirledi. Jospar jobasy Prezıdent pen memlekettiń strategııalyq qujattarynda aıqyndalǵan mindetter negizinde ázirlengen. Jospar jobasy 16 zań jobasyn ázirleýdi kózdeıdi. Olar: áleýmettik qamsyzdandyrý, dene shynyqtyrý jáne sport, arnaıy memlekettik organdar qyzmetkerleri men áskerı qyzmetshilerdiń turǵyn úı qatynastary, erekshe taýarlardy baqylaý, vızýaldyq aqparat jáne basqa salalardy odan ári damytýǵa baǵyttalǵan», - dedi Natalıa Pan.
Onyń aıtýynsha, 2020 jyly jańa 2 zań jobasyn ázirleý josparlanǵan. Olar: Erekshe taýarlardy baqylaý týraly jáne Ósimdik álemi týraly zań jobalary. Erekshe taýarlardy baqylaý týraly zań jobasy jańa redaktsııada ázirleý ulttyq baqylaý júıesin jetildirý, ulttyq jáne óńirlik qaýipsizdikti qamtamasyz etýge baǵyttalǵan. Al Ósimdik álemi týraly jańa zań jobasyn ázirleý ósimdik dúnıe nysandaryn qorǵaý salasyndaǵy qatynastardy retteýdi qamtamasyz etý, tıimdi basqarý úshin jaǵdaı jasaý maqsatynda qajet.
«Munan bólek, aldaǵy jyly Memleket basshysynyń 2019 jylǵy 2 qyrkúıektegi Qazaqstan halqyna Joldaýyn iske asyrý jónindegi jalpyulttyq is-sharalar josparynan týyndaıtyn 2 zań jobasy Parlamentke engiziletin bolady», - dedi ol.
Vıtse-mınıstr dereginshe, 2020 jyldyń 1-jartyjyldyǵynda Parlamentke atalǵan 16 zań jobasynyń 4-eýin, 2-jartyjyldyqta 12-sin engizý josparlanǵan.
«Zań jobalaý jumystarynyń sapasyna Parlament te, Prezıdent Ákimshiligi de syn-eskertpeler aıtyp otyr. Sondyqtan Ádilet mınıstrligi zań jobalarynyń sapasyn jaqsartý úshin túbegeıli sharalar qabyldaýy qajet. Jospar jobadaǵy zań jobalaryn Májiliske engizý merzimderi belgilengen. Zań jobalarynyń basym bóligi 2-jartyjyldyqta engizý josparlanǵan. Bul bir jaǵynan olardy sapaly ázirleýge múmkindik beredi. Ádilet mınıstrligi osy máseleni erekshe baqylaýǵa alsyn», - dedi óz kezeginde QR Premer-Mınıstri Asqar Mamın.
