Ádilet mınıstrligi tarapynan Halyqqa qyzmet kórsetý ortalyqtaryna tek quqyqtyq nemese ádistemelik kómek kórsetiledi
STANA. Mamyrdyń 20-sy. QazAqparat /Rýslan Ǵabbasov/ - Halyqqa qyzmet kórsetý ortalyqtarynyń qyzmetin uıymdastyrý ákimdikterdiń quziretinde.
Bul týraly búgin Astanada ótken brıfıngte Ádilet mınıstrliginiń resmı ókili Erbol Erimbetov málim etti, dep habarlaıdy QazAqparat.
«Atap aıtqanda, HQO-lar bıylǵy jyldyń qańtarynan bastap ákimdikterdiń qaramaǵyna berilgeni belgili. Ádilet mınıstrliginiń tarapynan tek qana HQO-ǵa quqyqtyq nemese ádistemelik kómek kórsetiledi»,-dedi resmı ókil. E. Erimbetovtyń sózine qaraǵanda, mınıstrlik halyqqa qyzmet kórsetý ortalyqtarynyń jumys isteý nusqalaryn, normatıvtik-quqyqtyq aktilerin jasaý, qyzmetterdi standarttar aıasynda atqarý mindetterin qaraıdy.
«Jergilikti jerlerde HQO-lardyń qyzmetin uıymdastyrý bul ákimdikterdiń quziretinde. Sondyqtan osydan bir aı buryn halyqqa qyzmet kórsetý ortalyqtarynda týyndaǵan máselelerdi ákimdikter retteýi tıis edi»,-dedi resmı ókil.
«Qańtardyń 15-inde HQO-lardy ákimdikterge berý týraly Úkimettiń qaýlysy qabyldandy. Qazirgi kezde halyqqa qyzmet kórsetý ortalyǵynyń mártebesin anyqtaıtyn basqa qujat qabyldanǵan joq», - dedi ol.
Budan buryn habarlanǵandaı, Májilis depýtattarynyń biri halyqqa qyzmet kórsetý ortalyqtaryn jergilikti atqarýshy organdardyń quzyryna berý, erterek qolǵa alynǵan shara ekenin málimdegen bolatyn. Onyń aıtýynsha, qazir aımaqtardaǵy halyqqa qyzmet kórsetý ortalyqtarynda uzynsonar kezek. Osyǵan oraı qazir osy salanyń jumysyn jetildirýdegi tıimdi baǵyttardyń biri retinde halyqqa qyzmet kórsetý ortalyqtaryn qaıtadan Ádilet mınıstrliginiń quzyryna berý qajet bolyp otyr.
