Ádilet mınıstrligi sottalǵandarǵa raqymshylyq jarııalaýǵa áli erterek dep sanaıdy
ASTANA. Qyrkúıektiń 24-i. QazAqparat /Qanat Mámetqazyuly/ - Ádilet mınıstrligi elimizdegi quqyq qorǵaý organdarynda reformanyń júrgizilýine baılanysty sottalǵandar úshin raqymshylyq jarııalaýǵa áli erterek dep sanaıdy. Bul týraly búgin QR Ádilet mınıstrliginde ótken brıfıng barysynda vedomstvonyń resmı ókili Erbolat Erimbet málim etti.
Resmı ókildiń aıtýynsha, Memleket basshysynyń «Qazaqstan Respýblıkasynda quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» Jarlyǵyna sáıkes, búgingi kúni zańnamalardy izgilendirý, qylmystardy krımınalsyzdandyrý jumystary atqarylyp jatyr. «Osyǵan oraı, Ádilet mınıstrligi elimizde amnıstııa jarııalaýǵa áli erterek dep sanaıdy», dedi mınıstrlik ókili.
Sonymen qatar, E. Erimbet jýrnalıster tarapynan qoıylǵan saýal boıynsha Qaraǵandy oblysyndaǵy túrmede oryn alǵan oqıǵalarǵa da túsinik berip ótti.
«Qyrkúıektiń 20-synda Qaraǵandy oblysy Dolınka kentindegi AK 159/7 mekemesinde túrmedegi 8 jazasyn óteýshi ózderine dene jaraqattaryn salǵan. Qazigi kúni olardyń densaýlyǵy táýir. Al olardyń áreketine keletin bolsaq, sottalýshylar zańsyz talaptardy aldyǵa tartqan. Máselen, olar kezekshilikti joıýdy, túzeý mekemesine erkin júrip-turýǵa jaǵdaı jasaýdy, sondaı-aq sálemdemelerge shekteýdi alyp tastaýdy suraǵan. Bundaı talaptardyń barlyǵy Qylmystyq-atqarý kodeksimen retteledi jáne ondaılarǵa shekteý sharalary salynǵan. Qazir qyzmettik tekserýler júrgizilýde», dedi E. Erimbet.
