Ádilet mınıstrligi otandyq úzdik ónertapqyshtardy marapattaıdy

ASTANA. 18 mamyr. QazAqparat - 23 mamyrda VІ Astana ekonomıkalyq forýmy aıasynda «ShAPAǴAT-2013» ónertapqyshtyq salasyndaǵy jetistikterdiń respýblıkalyq baıqaýy jeńimpazdaryn saltanatty marapattaý rásimi ótkiziledi, dep habarlady QR Ádilet mınıstrliginiń baspasóz qyzmetinen.

Baıqaýdyń maqsaty - Qazaqstan Respýblıkasynda zııatkerlik menshiktiń rólin arttyrý, ónertapqyshtyq qyzmetti jandandyrý, ónertapqyshtyq jáne ınnovatsııany damytýǵa kómek berý ári yntalandyrý, ónertapqyshtyq pen ınnovatsııalyq salaǵa ınvestıtsııa tartý jáne óndiristik sektorǵa perspektıvaly daıarlanymdardy engizý.

Budan basqa, ónertapqyshtardy kótermeleý jáne Qazaqstan Respýblıkasynda ónertapqyshtyq qyzmetti belsendirý maqsatynda «Qazaqstan Respýblıkasynyń eńbegi sińgen ónertapqyshy» konkýrsy ótkizildi. Osyǵan oraı qurmetti ataqty ıemdený týraly dıplomdar men eskertkish taspalar beriletin bolady.

Marapattaý saltanatynyń aýqymynda óndiriske engizilgen, qyzyqty jáne perspektıvaly ónertabystardyń kórmesi uıymdastyrylady.