Ádilet mınıstrligi OQO óńirlik ǵylymı-óndiristik zerthanasynyń bas sarapshysy 3 jyl 6 aıǵa bas bostandyǵynan aıyryldy - QR Bas prokýratýrasy
ASTANA. 9 maýsym. QazAqparat /Gúlmıra Álıakparova/ - Para berý barysynda alynǵan 2 myń AQSh dollary kólemindegi zattaı aıǵaqty jalǵan aqshaǵa aıyrbastap, syıaqy alǵan Ádilet mınıstrliginiń OQO óńirlik ǵylymı-óndiristik zerthanasynyń bas sarapshysy 3 jyl 6 aıǵa bas bostandyǵynan aıyryldy.
QR Bas prokýratýrasynyń baspasóz qyzmeti taratqan aqparatqa súıensek, 2010 jyldyń 19 qarashasynda QR Ulttyq qaýipsizdik komıtetiniń Ońtústik Qazaqstan oblysy boıynsha departamentiniń qyzmetkerleri atalmysh departamenttiń shuǵyl ýákiline 2 myń AQSh dollary kóleminde para berý ústinde OQO boıynsha Іshki ister departamenti Jol polıtsııasy basqarmasynyń aýdanaralyq tirkeý-emtıhan bóliminiń bastyǵyn ustady.
Oqıǵa ornynan alynǵan zattaı aıǵaq - 2 myń AQSh dollaryn QR UQK OQO boıynsha departamentiniń tergeýshisi tizimdep alyp, QR Qylmystyq kodeksiniń 312 baby, 2-tarmaǵy boıynsha qylmystyq is qozǵady. Bir aıdan keıin basqarmanyń arnaıy prokýrory qylmystyq isti jan-jaqty jáne tolyqqandy tergeý úshin zattaı aıǵaq retinde alynǵan 2 myń AQSh dollarynyń túpnusqalyǵyn anyqtaý maqsatynda sot-tehnıkalyq saraptama taǵaıyndaıdy.
Biraq, QR Ádilet mınıstrligi Sot saraptama ortalyǵynyń Ońtústik Qazaqstan óńirlik ǵylymı-óndiristik zerthanasynyń bas sarapshysy - Jumadilov, ózine jáne ózgege paıda ákelý maqsatynda belgisiz tulǵamen aldyn ala aýyz jalasyp, saraptamaǵa kelip túsken 2 myń AQSh dollaryn túrli-tústi prınterde ázirlengen qarajattarǵa aıyrbastap jibergen. Jalǵan aqshalardyń serııasy men nómiri zertteýde bolǵan AQSh dollarlarymen birdeı etip jasalǵan. Jumadilov naǵyz aqshalardy jalǵan aqshalarǵa aıyrbastaı otyryp, ózine 1500 AQSh dollary kóleminde syıaqy alǵan. Keıin, sot saraptamasyna kelip túsken 2 myń AQSh dollary «túrli-tústi prınterde ázirlengen jalǵan aqshalar» degen qorytyndy jasaıdy.
Oblystyń arnaıy prokýrorlary Jumadilovtyń ústinen bile tura jalǵan qorytyndy jasaǵany úshin, zattaı aıǵaqtardy ózgege bergeni jáne olardy burmalaǵany úshin QR QK-niń 357, 348, 352 jáne 339 baptary boıynsha qylmystyq is qozǵady. Kóp uzamaı olar boıynsha tergeý amaldaryn aıaqtap, sotqa tapsyrdy.
2011 jyldyń 13 mamyrynda Shymkent qalasynyń ál-Farabı aýdandyq soty is boıynsha úkim shyǵardy. Jumadilov QR QK-niń 357 babynyń 1 tarmaǵy jáne 352 babynyń 2 tarmaǵy boıynsha aıypty dep tanylyp, 3 jyl 6 aıǵa bas bostandyǵynan aıyryldy.
