Ádilet mınıstrligi memorgandar ázirleıtin zań jobalarynyń sapasyn jaqsartpaq
ASTANA. 1 qazan. QazAqparat - Ádilet mınıstrligi memlekettik organdar ázirleıtin zań jobalarynyń sapasyn jaqsartýǵa baǵyttalǵan keshendi sharalar qamtydy.
Búgin Májiliste ótken Úkimet saǵatynda baıandama jasaǵan Ádilet mınıstri Berik Imashev osylaı málim etti.
«Birinshiden, usynylatyn zań jobalaryn Úkimet janyndaǵy Vedomstovaralyq komıssııada aldyn ala qaraý engiziledi. Mundaǵy basty mehanızm memlekettik organdar komıssııanyń barlyq músheleriniń ustanymdaryn eskere otyryp, qujattyń tujyrymdamasyn jetildiretin bolady. Eger kelispeýshilik oryn alǵan jaǵdaıda Komıssııa músheleriniń ustanymy otyrysta qaralady. Al komıssııa quramy memleket organdarynyń qyzmetkerlerinen bólek, Parlament depýtattarynan, úkimettik emes uıym ókilderinen turady. Ekinshiden, zań jobalarynyń tujyrymdamalaryna qorytyndy beretin zańnama ınstıtýttarynyń jumysy jandana tústi. Instıtýt qyzmetkerleri zań jobalaýdyń jumys toptaryna qatysatyn boldy», - deıdi Berik Imashev. Onyń aıtýynsha, jyl basynan beri zańnama ınstıtýttary 72 tujyrymdama boıynsha konsýltatsııalar jasaǵan. Budan bólek, zań jobalarynyń sapasyn jaqsartý maqsatynda zańnama tehnıkalaryn monıtorıngileý jumystaryn da jetildire túsken. Sonymen qatar, Ádilet mınıstrliginiń saıtynda josparǵa engen barlyq zań jobalarynyń bazasy ornalastyrylǵan. Onda árbir jobalardyń ázirlenýinen bastap, onyń Parlamentpen qabyldanýyna deıingi aralyqtaǵy barlyq jumysy aıqyn kórsetiledi.
«Biz aldaǵy ýaqytta da mınıstrlik qyzmetin jetildirýge nıettimiz», - dedi ol.
