Ádilet mınıstrligi Qylmystyq atqarý júıesi komıtetinde kadrlyq ózgerister boldy
ASTANA. Shildeniń 8-i. QazAqparat /Ǵalymjan Hasenov/ - Ádilet mınıstri Rashıd Túsipbekovtyń buıryǵymen Qylmystyq atqarý júıesi komıtetiniń tóraǵasy Meıram Aıýbaev otstavkaǵa jiberildi,
dep habarlaıdy atalmysh komıtettiń baspasóz ortalyǵy.
Penıtentsıarly júıeniń baspasóz ortalyǵy atap ótkendeı, Mańǵystaý oblysy Aqtaý qalasyndaǵy qatań rejimdi túrmeden maýsymnyń 22-si kúni qylmyskerlerdiń qashyp ketýi jurtshylyq arasynda keń talqyǵa túsken edi. Qaza tapqandar men jaraqat alǵandar bar. Osyndaı tótenshe jaǵdaıdan keıin Qylmystyq atqarý júıesi komıtetiniń barlyq basshylary óz erkimen otstavkaǵa ketý týraly raport bergen. Búgingi tańda mınıstr tek jeke qyzmettik tulǵalardyń ótinishin qanaǵattandyrdy. QAJK tóraǵasynan basqa, taǵy da eki orynbasar otstavkaǵa ketti.
Qazirgi tańda QAJ komıteti tóraǵasynyń qyzmetin orynbasarlardyń biri, quqyq qorǵaý organdarynda kóp jyl qyzmet etken, ádilet polkovnıgi, 54 jastaǵy Marat Shabaqbaev atqarýda, dep atap ótti baspasóz ortalyǵy.
