Ádilet mınıstrligi: Kóshe ataýlary ózgergende HQO-ǵa barýdyń qajeti joq

NUR-SULTAN. QazAqparat – Budan bylaı jyljymaıtyn múlik ıeleri eldi mekender men kóshelerdiń ataýlary ózgergen jaǵdaıda Halyqqa qyzmet kórsetý ortalyqtaryna baryp, tirkeýdi 3 kún kútpeıtin boldy, dep habarlaıdy QazAqparat tilshisi.

«Qazaqstan Respýblıkasynyń keıbir zańnamalyq aktilerine memlekettik qyzmet kórsetý máseleleri boıynsha ózgerister men tolyqtyrýlar engizý týraly» zańnyń qabyldanýy – osy erejeniń kúshin joıyp otyr. Bul málimetter jyljymaıtyn múlik júıesine avtomatty túrde túsip, qandaı da bir qujattardy ákelýdi qajet etpeıdi.

Buryn tegi jáne basqa da derekteri ózgergen jaǵdaıda jyljymaıtyn múlik ıeleri HQO-ǵa júginetin edi. Endi bul rásim alynyp tastalyp, barlyq derekter AHAJ júıesinen kelip túsedi», - dep habarlady mınıstrlikten.

Atap óterligi, bir jyl ishinde elimiz boıynsha osyndaı ótinishpen 28 myńǵa jýyq azamat júgingen.