Ádilet mınıstrligi kelesi jyldan bastap taǵy birneshe elektrondy qyzmet túrlerin qoldanysqa engizbekshi
ASTANA. 25 qazan. QazAqparat /Aıdar Ospanalıev/ - Ádilet mınıstrligi kelesi jyldan bastap, «Bala týý sharasyn tirkeýge ótinish berý», «Neke buzý sharasyn tirkeýge ótinish berý», sondaı-aq qujattardy retteýge ótinish berý sııaqty elektrondy qyzmet túrlerin qoldanysqa engizýdi josparlap otyr.
Bul týraly búgin Astanada Ádilet mınıstrligi tarapynan kórsetiletin memlekettik qyzmetke baılanysty ótken semınar barysynda Ádilet vıtse-mınıstri Ámirhan Amanbaev málim etti.
Onyń sózine qaraǵanda, búgingi tańda memlekettik organdardyń qyzmetteri memlekettik qyzmettiń sapasyn arttyrýdy kózdeıdi. «Sonymen qatar bıýrokratııa men sybaılas jemqorlyq, qaǵazbastylyq, sııaqty ózge de ákimshilik kedergilerdi joıý Ádilet mınıstrligi aldyna qoıylyp otyrǵan basty mindetterdiń bir. Osy rette Ádilet mınıstrliginiń búgingi tańda elektrondy úlgide 22 qyzmet túrin kórsetetindigin atap ótý kerek. Al bıylǵy «Elektrondy úkimet» portalynda jańa «Nekeni tirkeýge ótinish berý» elektrondy qyzmeti iske qosyldy»,-dedi mınıstrdiń orynbasary.
Semınar barysynda vıtse-mınıstr elektrondy jolmen alǵash tirkelgen jas jubaılardy quttyqtap, mınıstrlik atynan arnaıy syılyq tabys etti.
