Ádilet mınıstrligi «Qazaqstan halyq kongresi» partııasynyń qujattaryn qabyldady

ASTANA. QazAqparat - Ádilet mınıstrligine 2023 jylǵy 31 qańtarda «Qazaqstan halyq kongresi» ınternatsıonaldyq demokratııalyq partııasyn qurý nıeti týraly habarlama kelip tústi, dep habarlaıdy QazAqparat mınıstrlikke silteme jasap.

«Saıası partııalar týraly» Zańnyń 6-babyna sáıkes partııa keminde jeti júz adamnan turatyn azamattar tobynyń bastamasymen qurylady, saıası partııalardy tirkeýdi Ádilet mınıstrligi júzege asyrady.

Tirkeýshi organ habarlamany jáne qujattardy alǵan kúni uıymdastyrý komıtetiniń ýákiletti tulǵasyna olardyń usynylǵanyn rastaıtyn qujat beredi.

«Saıası partııalar týraly» Zańnyń 12-babyna sáıkes memlekettik organdarǵa usynylǵan tizimderdiń durystyǵyn tekserý fýnktsııasy júktelgen.

Usynylǵan qujattardy tekserý qorytyndysy boıynsha Ádilet mınıstrligi sol kúni «Qazaqstan halyq kongresi» ınternatsıonaldyq demokratııalyq partııanyń qujattardy usynǵany týraly rastama berildi.

Sonymen qatar uıymdastyrý komıteti rastama alǵan kúnnen bastap 3 aıdan keshiktirmeı quryltaı sezin ótkizýi tıis.

Quryltaı sezinen keıin uıymdastyrý komıteti partııaǵa múshelerdi qabyldaý boıynsha jumys júrgizedi, olar keminde 5 myń bolýy tıis.

Partııany tirkeýge arnalǵan qujattar quryltaı sezi ótkizilgen kúnnen bastap 4 aıdan keshiktirilmeı usynylýy tıis.

2023 jylǵy aqpandaǵy jaǵdaı boıynsha respýblıka boıynsha 7 saıası partııa tirkelgen:

1. «Amanat» partııasy;

2. «Aq Jol» Qazaqstan demokratııalyq partııasy;

3. Qazaqstan Halyq partııasy;

4. «Aýyl» halyqtyq-demokratııalyq patrıottyq partııasy;

5. «Jalpyulttyq sotsıal-demokratııalyq partııa»;

6. Qazaqstandyq Jasyldar partııasy «Baıtaq»;

7. «Respublica» partııasy.