Ádilet mınıstrligi qarjy-ekonomıkalyq qylmystardy odan ári dekrımınalızatsııalaýǵa baǵyttalǵan jobany tanystyrdy
ASTANA. 24 mamyr. QazAqparat - Memleket basshysynyń aǵymdaǵy jylǵy Joldaýynda júktelgen tapsyrmalarǵa sáıkes, Ádilet mınıstrligi «QR keıbir zańnamalyq aktilerine qarjy-ekonomıkalyq qylmystardy odan ári dekrımınalızatsııalaý máseleleri boıynsha ózgerister men tolyqtyrýlar engizý týraly» zań jobasyn ázirledi.
Búgin Ádilet mınıstrliginde atalǵan másele jóninde dóńgelek ústel ótip, onda jańa zań jobasynyń tanystyrylymy bolyp ótti.
«2010-2020 jyldarǵa arnalǵan Qazaqstan Respýblıkasynyń quqyqtyq saıasat tujyrymdamasyna sáıkes, ulttyq zańnamany odan ári jetildirýdiń negizgi baǵyty retinde qylmystyq zańnamany gýmanızatsııalaý máselesi qarastyrylǵan bolatyn. Osy maqsatty júzege asyrý úshin qarjy-ekonomıkalyq qylmystardy odan ári dekrımınalızatsııalaý máselelerin qamtıtyn joba daıyndalyp otyr. Bul joba negizinen japa shekken taraptyń múddesi úshin keltirilgen shyǵyndarǵa qatysty qalpyna keltirý ádilsotyn, sondaı-aq bas bostandyǵynan aıyrýǵa balama jaza túrlerin engizýdi keńeıtý máselelerin qarastyrady», - deıdi jıynǵa jetekshilik etken Ádilet vıtse-mınıstri Dýlat Qusdáýletov.
Al májilis depýtaty Svetlana Bychkovanyń aıtýynsha, Qazaqstannyń ekonomıka aýqymy, sondaı-aq bastan ótkerip otyrǵan ıntegratsııalyq úderister ekonomıkalyq qylmystar zańnamasyn lıberaldandyrýdy asa qajet etedi. Osy baǵytta buǵan deıin byltyrǵy jyly arnaıy zań jobasy qabyldanǵan bolatyn.
«Zańnamany gýmanızatsııalaýǵa baǵyttalǵan bul qujat qazirdiń ózinde bıznesti damytýǵa qatysty memlekettik qurylymdar tarapynan oryn alyp jatatyn qysymdy birshama seıiltti. Al búgingi zań jobasy buǵan deıingi qadamdardyń qısyndy jalǵasy bolyp tabylady dep senemiz», - deıdi S. Bychkova.
Al qujatty ázirleýshilerdiń aıtýynsha, jańa zań jobasynyń normalary elimizdiń ınvestıtsııalyq klımatyn odan saıyn jaqsartýǵa, shaǵyn jáne orta bıznestiń damýyna qosymsha serpin berip, ulttyq zańnamamyzdy eýropalyq standarttarǵa sáıkestendiredi.
