Ádilet mınıstrligi «qaǵaz» lıtsenzııasynan bas tartyp, olardy tek elektrondy túrde berýdi bastaıdy
ASTANA. 17 tamyz. QazAqparat - Aǵymdaǵy jyldyń 15 tamyzynan bastap Ádilet mınıstrligi advokattyq, notarıaldyq jáne baǵalaý qyzmetimen aınalysý quqyǵyna lıtsenzııalardy «E-lıtsenzııalaý» memlekettik derekter qory arqyly tek elektrondy formatta berýge kiristi,
dep habarlady QR Ádilet mınıstrliginiń baspasóz qyzmeti.
Bul bastamanyń artyqshylyǵy - elektrondy lıtsenzııany joǵaltý nemese búldirý múmkin emes, osyǵan baılanysty azamattarǵa lıtsenzııa telnusqasyn alý úshin óz ýaqytyn jáne qarjysyn jumsaýdyń qajeti joq.
Buǵan qosa, endi lıtsenzııa ıelenýshilerine óziniń mártebesin rastaý úshin memlekettik lıtsenzııanyń kóshirmesin túsirý kerek emes, tipti notarıaldyq kýálandyrýdyń qajeti joq.
Lıtsenzıattarǵa tek jeke basyn kýálandyratyn qujatty kórsetý jetkilikti, al memlekettik organdarǵa, advokattar alqasyna, notarıaldyq palatalarǵa jáne baǵalaýshylar palatasyna lıtsenzııanyń bar-joǵy týraly málimetti «E-lıtsenzııalaý» memlekettik derekter qory arqyly tekserý jetkilikti.
Sonymen qatar, «qaǵaz» lıtsenzııasynan bas tartý lıtsenzııalardyń blankilerine jáne olardy ótinish ıesine jetkizýge jumsalatyn bıýdjettik qarjyny aıtarlyqtaı qysqartady.
http://www.elicense.kz ınternet-resýrsynda aqparattyq júıeni paıdalanýshyǵa jan-jaqty aqparat ornalastyrylǵan. Týyndaǵan suraqtar boıynsha azamattarǵa 1414 CALL-ortalyǵyna habarlasýǵa bolady.
