Ádilet mınıstrligi HQKO-nyń bir ótinish qaǵıdasy boıynsha jumys isteý múmkindigin qarastyrýda
ASTANA. Qańtardyń 16-sy. QazAqparat /Ernur Aqanbaı/ - Qazirgi tańda Ádilet mınıstrligi Halyqqa qyzmet kórsetetin ortalyqtardyń bir ótinish qaǵıdasy boıynsha jumys isteý múmkindigin qarastyrýda. Bul týraly búgin atalmysh mınıstrliktiń alqa májilisinde vedomstvo basshysy Rashıd Túsipbekov málim etti,
dep habarlaıdy QazAqparat.
Onyń aıtýynsha, bul usynystyń máni azamattardy memlekettik qyzmet alý úshin atalmysh ortalyqtarǵa kóptegen qujattardyń kóshirmelerin tapsyrýdan bosatý. Qajetti qujattar týraly aqparattar túgeldeı málimetter bazasynda bar. «Memlekettik qyzmet tek ótinishtiń jáne jeke tulǵany kýálandyratyn qujat kóshirmesiniń negizinde kórsetiletin bolady. Halyqqa qyzmet kórsetetin ortalyqtardyń bir ótinish qaǵıdasymen jumys isteýi qazaqstandyqtar úshin memlekettik qyzmetti alý tártibin edáýir jeńildetip, olardy artyq shyǵyndardan bosatady. Sondaı-aq ádilet organdaryndaǵy qujat aınalymyn qysqartady», dedi mınıstr.
