Ádilet mınıstrligi ekonomıkalyq qylmystarǵa qatysty jazalardyń balama túrlerin aıtarlyqtaı keńeıtýdi usynady

Bul týraly búgin mınıstrlikte «QR keıbir zańnamalyq aktilerine qarjy-ekonomıkalyq qylmystardy odan ári dekrımınalızatsııalaý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

«Biz buǵan deıin QR Qylmystyq kodeksiniń qarjylyq-ekonomıkalyq qylmystardy qamtıtyn 7 bólimine saraptama jasap shyqqan edik. Sonyń barysynda bas bostandyǵynan aıyrýǵa balama jaza túrleriniń qoldanylmaı otyrǵanyn ańǵardyq. Sondyqtan da, ekonomıkalyq qylmystardyń birqatary boıynsha bas bostandyǵynan aıyrýǵa qatysty balama jaza túrlerin qoldanýdy keńeıtýdi usynyp otyrmyz. Budan bólek, bizdiń kózqarasymyz boıynsha qylmystyq kodekstiń osy bóliminde birqatar qylmystar formaldy sıpatqa ıe. Sondyqtan da, bulardy «qylmystyń materıaldyq quramy» dárejesine aýystyrýdy usynamyz», - deıdi Ádilet mınıstrligi Strategııalyq josparlaý jáne uıymdastyrý-taldaý jumysy departamentiniń dırektory Isıdor Borchashvılı. 

Onyń aıtýynsha, zań jobasy boıynsha usynylatyn jaza túrleriniń qatarynda «materıaldyq shyǵynnyń ornyn «eki eselengen mólshermen» óteý jazasy da belgilenip otyr. Degenmen, buǵan qarsy pikirler de barshylyq.

«Jazanyń osy túrine qarsy shyǵatyndar negizinen «búgingi kúni ekonomıkalyq qylmystardy dekrımınalızatsııalaý barysynda bundaı máseleni qaraýdyń qajeti joq edi, óıtkeni bul qazirgi tańda ázirlenip jatqan jańa Qylmystyq kodekstiń jobasynda qamtylyp jatyr» degendi alǵa tartady. Al bizdiń oıymyzsha, eger jańa Kodekstiń jobasynda bul qamtylatyny anyq bolsa, endeshe osyndaı mańyzdy máseleni nege keıinge ysyrý kerekpiz.  Ony búginnen zańnama júzinde sińire berýimiz kerek» ,- dedi I. Borchashvılı.