Ádilet mınıstrligi bıylǵy zań jobalaý josparyn jarııalady

NUR-SULTAN. QazAqparat –QR Ádilet vıtse-mınıstri Natalıa Pan mınıstrliktiń osy jylǵa arnalǵan zań jobalaý josparyn jarııalady, dep habarlaıdy QazAqparat tilshisi.

«Zań jobalaý qyzmetin úılestirý aıasynda Ádilet mınıstrligi Úkimettiń zań jobalaý jumysynyń 2020 jylǵa arnalǵan josparyn ýaqtyly oryndaý jóninde sharalardy qabyldady. Bastapqyda jospar 17 zań jobasyn ázirleýdi jáne Parlamentke engizýdi kózdedi. Jyl ishinde engizilgen túzetýlerdi eskere otyryp, jospar 22 zań jobasyn ázirleýdi jáne Parlamentke engizýdi qamtydy. Olardyń 8-ine Memleket basshysy qol qoıdy jáne 14-i Parlamenttiń qaraýynda», - dedi ol mınıstrliktiń keńeıtilgen alqa otyrysynda.

Onyń atap ótýinshe, Úkimettiń zań jobalaý jumystarynyń 2020 jylǵa arnalǵan jospary tolyq kólemde oryndaldy.

«Memleket basshysy alǵa qoıǵan mindetterdi, sondaı-aq strategııalyq qujattardy eskere otyryp, Ádilet mınıstrligi múddeli memlekettik organdarmen birlesip ázirlegen Zań jobalaý jumystarynyń 2021 jylǵa arnalǵan jospary 2020 jyldyń jeltoqsanynda bekitildi. Onda 25 zań jobasyn ázirleý kózdelgen. Onyń ishinde 1-jartyjyldyqta Parlamentke 13 zań jobasyn, al 2-jartyjyldyqta 12 zań jobasyn engizý josparlanǵan», - dedi Natalıa Pan.