Ádilet mınıstrligi azamattarǵa ázirlenetin zań jobalaryn talqylaýǵa qatysýdy usynady
ASTANA. 3 naýryz. QazAqparat /Marlan Jıembaı/ - Ádilet mınıstrligi memlekettik organdarǵa zań jobalarynyń mátinin óz ınternet-resýrstarynda ornalastyryp qana qoımaı, azamattarǵa eskertýler men usynystaryn joldaý múmkindigin qamtamasyz etýdi usynady.
Bul týraly búgin Ádilet mınıstrliginde ótken baspasóz máslıhatynda atalǵan vedomstvonyń resmı ókili Erbolat Erimbet málim etti.
Onyń atap ótýinshe, qazirgi tańda otandyq ınternet segmentte qandaı da bir sala boıynsha arnaıy tanymǵa ıe belsendi paıdalanýshylar kóp. «Sáıkesinshe, olardyń usynystary zań jobasyn jasaý kezeńinde jekelegen normalardyń áleýmettik, ekonomıkalyq jáne quqyqtyq saldaryn boljaýǵa múmkindik beredi», - dedi resmı ókil.
E.Erimbettiń pikirinshe, qazaqstandyq ınternet paıdalanýshylar úshin óz usynystary men eskertpelerin joldaý múmkindigi barynsha jeńil bolýy qajet. «Zań jobasy tirkeýsiz, qandaı da bir elektrondyq kiltti almaı-aq talqylanýy kerek», - dedi ol.
Esterińizge sala keteıik, aǵymdaǵy jyly Parlamentke 36 zań jobasy usynylady. Olardyń qatarynda Ákimshilik is júrgizý kodeksi, Ákimshilik quqyq buzýshylyq týraly kodeks, QR keıbir zańnamalyq aktilerine probatsııa qyzmeti máseleleri boıynsha ózgerister men tolyqtyrýlar engizý týraly zań jobalary bar.
