Ádilet mınıstrligi astananyń ataýyn ózgertýge qatysty túsinikteme berdi
Búgin 23 naýryzda QR Prezıdenti Qasym-Jomart Toqaev Konstıtýtsııaǵa ózgerister engizý týraly Zańǵa qol qoıdy. Sondaı-aq Prezıdent Astanany qaıta ataý týraly tıisti Jarlyqqa qol qoıdy.
Marat Beketaev Elordany qaıta ataý týraly Konstıtýtsııaǵa túzetýler tolyqtaı QR Konstıtýtsııasy men zańdaryna sáıkes engizilgenin taǵy da atap ótti. Ádilet mınıstri osy protsedýranyń zańdyq qyrlary týraly aıtyp berdi.
Ádilet mınıstrligi Konstıtýtsııanyń 91-babynda kózdelgendeı, astanany qaıta ataý úshin referendým ótkizý týraly máseleni Prezıdenttiń qaraýyna engizý úshin Jarlyq jobasyn ázirledi. Bul usynysty Úkimet qaýly túrinde Qasym-Jomart Toqaevqa jiberdi. Zań boıynsha, mundaı jaǵdaıda Prezıdent ne onyń ókilettigin ózine qabyldaǵan tulǵa úsh sheshimniń birin qabyldaýy tıis:
1) máseleni Parlamenttiń qaraýyna berýge,
2) suraqty respýblıkalyq referendýmǵa shyǵarýǵa,
3) Konstıtýtsııaǵa túzetýler engizý týraly usynysty qabyldamaýǵa.
Prezıdent birinshi joldy tańdap, máseleni Parlamenttiń qaraýyna berdi. Joǵary zań shyǵarýshy organ óz kezeginde palatalardyń birlesken otyrysynda Konstıtýtsııaǵa túzetýler engizý týraly zań qabyldady. Aıta ketý kerek, Parlament ony Konstıtýtsııanyń 91-baby 2-tarmaǵynyń talaptaryna sáıkestigi týraly Konstıtýtsııalyq Keńestiń oń qorytyndysy bolǵan jaǵdaıda qabyldaı alady.
Budan ári zań Parlament palatalary spıkerleriniń jáne Premer-Mınıstrdiń qoldarymen bekitiledi jáne Prezıdentke qol qoıýǵa jiberiledi. Qol qoıylǵan sátten bastap Konstıtýtsııaǵa ózgerister engizý týraly zań kúshine endi.
Ádilet mınıstri "Qazaqstan Respýblıkasynyń ákimshilik-aýmaqtyq qurylysy týraly" Zańǵa sáıkes Astanany qaıta ataý úshin qajetti jumys júrgizilgenin, sonyń nátıjesinde Prezıdent astanany qaıta ataý týraly Jarlyqqa qol qoıǵanyn atap ótti.
Belgilengen rásimge sáıkes Úkimet Prezıdentke oblystarǵa, aýdandarǵa, qalalarǵa ataý berý jáne olardy qaıta ataý jóninde usynystar engizedi. Bul respýblıkalyq onomastıka komıssııasynyń qorytyndysy negizinde jáne tıisti aýmaq halqynyń, onyń jergilikti ókildi jáne atqarýshy organdarynyń pikirin eskere otyryp júrgiziledi.
Ol úshin máslıhattyń turaqty komıssııalarynda jarııa tyńdaýlar ótkizý jolymen tıisti aýmaq halqynyń pikiri eskeriledi, olardyń qorytyndylary boıynsha hattama resimdeledi. Bul jaǵdaıda tyńdaýlar 20 naýryzda ótti jáne tıisti hattama astana.gov.kz saıtynda ornalastyrylǵan. Tyńdaýlar men hattama negizinde qalalyq máslıhat pen ákimdik respýblıkalyq onomastıkalyq komıssııaǵa tıisti usynys engizdi. Komıssııanyń qalany qaıta ataý týraly oń qorytyndysy 20 naýryzda alyndy.
Ádilet mınıstri qysqa merzimge qaramastan, barlyq rásimder qoldanystaǵy zańnamaǵa qatań sáıkestikte júrgizilgenin taǵy da atap ótti. Marat Beketaev elordaǵa Elbasy - Nur-Sultan esimin berý týraly sheshim Qazaqstan tarıhyndaǵy mańyzdy oqıǵa bolyp tabylatynyn atap ótti.
