Ádilet mınıstrligi Áleýmettik kodeks jobasynyń ázirlenetinin joqqa shyǵarmaıdy

ASTANA. QazAqparat - Ádilet mınıstrligi Áleýmettik kodeks jobasynyń ázirlenetinin joqqa shyǵarmaıdy. Bul týraly búgin Májiliste Ekonomıkalyq reforma jáne óńirlik damý komıtetiniń Qazaqstan Respýblıkasy Kásipkerlik kodeksiniń jobasyn talqylaý barysynda Ádilet vıtse-mınıstri Záýresh Baımoldına málim etti.

Toqtala ketetin jaıt, talqylaý barysynda depýtat Zaǵıpa Bálıeva elimizde Áleýmettik kodeks daıyndaýdyń ýaqyty da kelgenin aıtyp qalǵan bolatyn.

«Áleýmettik kodeksti ázirleý qajettigine kelsek, árıne, bul máseleniń kún tártibine qoıylǵanyna da birshama ýaqyt ótken. Alaıda, osyndaı kodekstiń qajettiligi týraly másele qoıylǵanda, buǵan qatysty bir zańnamaǵa shoǵyrlandyratyn qoldanystaǵy birqatar arnaıy salalyq zań aktileri daıyn bolmaǵany anyq. Sondyqtan da, Áleýmettik kodeks daıyndap, ony qabyldaý máselesi oń sheshimin tappaı kelgen shyǵar. Degenmen, bárin de ýaqyt kórsetedi. Óıtkeni, buǵan deıin de eshkim Kásipkerlik kodeksi kerek dep aıtqan joq bolatyn», - dedi vıtse-mınıstr.

Onyń aıtýynsha, qazirgi tańda Taý-ken kodeksi nemese jer qoınaýyn paıdalaný týraly kodeksin daıyndaý máselesi de kóterilip jatyr. Osyǵan baılanysty vıtse-mınıstr Záýresh Baımoldına qoǵam jetilgen saıyn onyń quqyqtyq qatynastaryn rásimdeý sharalary da jetilýi tıistigin atap ótti.

«Sondyqtan da, Áleýmettik kodeks jobasyn aldaǵy ýaqytta daıyndaý qajettigi týraly máseleni de qarastyra beretin bolamyz», - dedi ol.