Ádilet mınıstrligi:Advokattar úshin alǵashqy jarnany alyp tastaý kerek
ASTANA. QazAqparat - Advokattardyń kásibı ádep normalaryn saqtaýyn qamtamasyz etý maqsatynda eki deńgeıli tártiptik komıssııa qurylady. Bul týraly Parlament Májilisiniń jalpy otyrysynda «Advokattyq qyzmet jáne zań kómegi týraly» zań jobasyn talqylaý kezinde Ádilet mınıstri Marat Beketaev málim etti, dep habarlaıdy QazAqparat.
«Qazaqstanda advokattyq qyzmet naryǵy jetkilikti deńgeıde damymaǵan jáne ozyq elderdiń kórsetkishterine sáıkes kelmeıdi.
Onyń negizgi sebepteriniń biri - advokattardyń jetispeýi. Ol óz kezeginde úmitkerler úshin negizgi máselelerdiń biri bolyp tabylatyn óte joǵary kirý jarnalarynan týyndaıdy. Alǵashqy jarnalardyń alynyp tastalýy advokattyq mamandyqqa jas zańgerlerdiń kirýine, advokattardyń arasyndaǵy básekelestikti kúsheıtýge jáne olardyń sanynyń artýyna múmkindik beredi», - dep toqtaldy mınıstr.
Onyń paıymynsha, Qazaqstanda advokattarmen kórsetiletin kásibı qyzmetterdiń sapasyn tıimdi baqylaý joq.
«Ár advokattyń qashan jáne ne úshin tártiptik jaýapkershilikke tartylǵany týraly ashyq aqparat joq. Advokattardyń kásibı ádep normalaryn saqtaýyn, tártiptik isterdiń obektıvti jáne jan-jaqty qaralýyn qamtamasyz etý maqsatynda eki deńgeıli tártiptik komıssııany qurý qarastyrylǵan», - dep túsindirdi M. Beketaev.
Sonymen qatar vedomstvo basshysy elimizde advokattardyń biliktiligin arttyrý tetigi qalyptaspaǵanyn atap ótti. Al álemniń ozyq elderinde advokattardyń turaqty jáne júıeli túrde kásibı biliktiligin arttyrý mindeti zańnamamen bekitilgen.
«Advokatýranyń sapalyq quramyn jaqsartý maqsatynda zań jobasymen advokattardyń biliktiligin kóterý tetigi qarastyrylǵan.
Bul advokatýra salasynda básekelestikke jáne qyzmet sapasyna oń áserin tıgizedi», - dedi mınıstr.
Foto: intermediachannel.it
