Ádilet mınıstrligi advokattar sanyn arttyrýdyń jolyn aıtty

ASTANA. QazAqparat - Ádilet mınıstrligi advokat atanýdy jeńildetý men olardyń jaýapkershiligin arttyrý usynystaryn engizdi. Bul týraly Májiliste «Advokattyq qyzmet jáne zań kómegi týraly» zań jobasyn tanystyrý barysynda QR Ádilet mınıstriniń orynbasary Janat Eshmaǵambetov málim etti, dep habarlaıdy QazAqparat.

«Advokattyq kómekke halyqtyń suranysyn qamtamasyz etý maqsatynda osy kásipke kelýdiń jaǵdaıyn jeńildetý usynylady. Búginde Qazaqstanda qyzmet kórsetip júrgen qorǵaýshylardyń sany 4,5 myńnan sál astam. Sáıkesinshe, elimizde bir advokatqa 4 myńǵa jýyq adam tıesili. Al Batys Eýropa elderde qorǵaýshy kómegimen qamtamasyz etilýdiń ara salmaǵy 1 advokatqa shaqqanda 250-den 1 myń adamǵa deıin keledi. Búginde kóbisi advokattar alqasyna kirý jarnasynyń negizsiz joǵary bolýy sebebinen qorǵaýshy bola almaıdy. Onyń somasy 800 myń teńgege deıin jetedi», - dep túsindirdi mınıstrdiń orynbasary.

Onyń sózine qaraǵanda, sońǵy tórt jylda advokattar sany tek 300 adamǵa ósken. Advokat mamandyǵyna barýdy jeńildetý sharasy kirý jarnasy túrindegi múliktik kedergini joıýmen qamtamasyz etilmek. Atalǵan jarnany óndirýge shekteý engizý arqyly zańgerlik bilimi bar adamdarǵa advokat mártebesin alýǵa múmkindik beriledi dep kútilýde.

Budan bólek, advokatýranyń sapalyq quramyn jaqsartý maqsatynda zań jobasymen attestatsııany ótkizý men qorǵaýshylardyń biliktiligin arttyrý tetigi qaıta qarastyrylǵan.

Sonymen qatar J. Eshmaǵambetov zań jobasynda advokattar men zań konsýltanttarynyń jaýapkershiligin arttyrýǵa baǵyttalǵan jańashyldyqtar qamtylǵanyn jetkizdi.