Ádilet mınıstrligi 700-ge tarta qyzmetkerdi qysqartyp, 2 mlrd teńge únemdedi
«Osy jyldyń aqpanynan bastap Ádilet mınıstrliginiń aýmaqtyq deaprtamentteriniń bári de faktorly-baldy shkala júıesine ótti. Kelesi jyldan bastap jańa ádistemege sáıkes memlekettik qyzmetshilerdiń búkil jumys ótili esepteledy – bul olardyń aılyǵyn kezekti ret kóteredi. Qazirgi ýaqytta biz memlekettik qyzmetshilerdi, sondaı-aq vedomstvoishilik uıymdardyń qyzmetkerlerin ońtaılandyrý jumystaryn júrgizýdemiz. Osynyń arqasynda qarajat únemdeledi. Faktorly-baldy shkalaǵa ótý – oń tájirıbe kórsetti», - dedi Qasymqoja Ómirov Ádilet mınıstrliginiń onlaın rejımde ótken alqa májilisinde.
Onyń aıtýynsha memlekettik qyzmetshilerdiń ornyna legen báseke de qyza túsken. Buryn bir orynnnan bes adam úmittense, qazir bir vakantty orynnan úmitkerlerdiń sany 13 adamǵa deıin jetken.
«Vedomstvoishilik uıymdardaǵy qyzmetkerlerdiń sanyn bıyl 10, kelesi jyly 15 paıyzǵa qysqartamyz. Ótken jyldan beri memqyzmetshilerdi ońtaılandyrý jumysyn júrgizip, ol sharýany osy jyldyń alǵashqy toqsanynda aıaqtadyq. Bul jumys Ádilet mınıstrliginiń barlyq aýmaqtyq departamentterin faktorly-baldy shkalaǵa ótkizýge jol ashty. Biz 700-ge tarta qyzmetkerdi, shamamen barlyq qyzmetkerlerdiń 30 paıyzyn qysqarttyq. 200-ge tarta basshylyq laýazymy joıyldy. 30 myń sharshy metr keńse oryny, 109 kólik bosady. Qysqartylǵan qyzmetkerlerdiń ishinde basshylyqta bolǵandar da bar. Orta jáne tómengi sanattaǵy qyzmetkerlerdiń aılyǵy 2-2,5 ese ósti. Osylaısha 2 mlrd teńge únemdeldi. Ol qarajat qalǵan qyzmetkerlerdiń aılyǵyn arttyrýǵa jumsalyp otyr», - dedi ol.
