Ádilet mınıstrligi 14 naýryzdan bastap jeke sot oryndaýshylardan lıtsenzııa alýǵa qujattar qabyldaı bastaıdy
ASTANA. 10 naýryz. QazAqparat /Gúlnár Jandaǵulova/ - Ádilet mınıstrligi 14 naýryzdan bastap jeke sot oryndaýshy qyzmetimen aınalysýǵa quqyq beretin lıtsenzııa alýǵa azamattardan qujattar qabyldaı bastaıdy.
«QR Ádilet mınıstrligi Sot aktilerin oryndaý komıteti 2011 jyldyń 14 naýryzynan bastap jeke sot oryndaýshysy qyzmetinen úmitker azamattarǵa lıtsenzııa berý boıynsha qujattar qabyldaýdyń bastalatynyn málim etedi», - delingen Ádilet mınıstrliginiń resmı habarlamasynda.
Jeke sot oryndaýshysy qyzmetinen úmitker mamandarǵa birneshe talap qoıylyp otyr. Atap aıtqanda, olar Qazaqstan azamaty bolýy, 25 jasqa tolýy, biliktilik emtıhanyn tapsyrýy, bir jyldyq taǵylymdamadan ótýi, lıtsenzııa alýy jáne konkýrstyq irikteýden ótýi kerek.
"QR Sot oryndaýshylarynyń mártebesi jáne atqarýshylyq is júrgizý týraly» zańǵa sáıkes, lıtsenzııa turaqty sýdıalarǵa, óz mindetin atqarý kezinde zań buzǵany jáne atyna kir keltiretin áreketteri úshin qyzmetterinen bosatylǵan sýdıalardan basqa tulǵalarǵa, besjyldyq eńbek ótili bar atqarý óndirisi qyzmetkerlerine, prokýratýra organynda 10 jyl eńbek ótili bar is basyndaǵy prokýrorlarǵa beriledi. Lıtsenzııaǵa ıe bolǵan azamattar úsh jylda bir ret attestatsııadan ótýge mindetti.
