Ádilet mınıstri zań jobalaryn ázirleýge kez kelgen azamattyń qatysa alýyn qamtamasyz etpek
ASTANA. 6 sáýir. QazAqparat - Ádilet mınıstrligi ázirlenetin zań jobalarynyń sapasy kóbinese zań shyǵarmashylyǵynyń ashyqtyǵy men jarııalylyǵyna baılanysty dep sanaıdy.
Búgin QR Parlamenti Senatynda ótken zań shyǵarý qyzmetin jetildirý máselelerine arnalǵan Úkimet saǵaty barysynda Ádilet mınıstri Berik Imashev osylaı málim etti.
«Osyǵan oraı, Ádilet mınıstrligi elimizdiń kez kelgen qyzyǵýshylyq bildirgen tulǵasynyń zań jobalarynyń jumysyna aralasýyn qamtamasyz etý jónindegi sharalardy qabyldady. Osy úshin mınıstrliktiń saıtynda ázirlenip jatqan jáne ázirlenetin zań jobalarynyń elektrondyq baza málimetteri quryldy», - deıdi mınıstr.
Onyń aıtýynsha, elektrondyq bazada árbir zań jobasy boıynsha sol qujattyń Parlamentpen qabyldanǵanǵa jáne Elbasyna qol qoıýǵa joldanǵanǵa deıingi barlyq aqparattary naqty qamtylǵan.
«Búgingi kúni málimetter bazasynda 125 zań jobasy bar. Men buny norma shyǵarý úderisindegi zamanaýı qadam dep bilemin. Endi elimizdiń kez kelgen azamaty ázirlenip jatqan zań jobasy boıynsha ózderiniń usynystaryn jasaýǵa múmdindik alady», - deıdi B. Imashev.
Mınıstr sonymen qatar, bul jumysty odan saıyn jetildirý jumystaryn da qolǵa alatynyn atap ótti.
