Ádilet mınıstri Rashıd Túsipbekov Almatyda keńes ótkizdi

dep habarlady mınıstrliktiń baspasóz qyzmeti.

Keńeske ádilet, qylmystyq-atqarý júıesi, sot aktilerin oryndaý departamentteriniń bastyqtary men olardyń orynbasarlary, jyljymaıtyn múlik ortalyǵy, óńirlik ǵylymı-óndiristik sot saraptamasy zerthanasynyń dırektorlary men qalalyq ádilet departamentteriniń qyzmetkerleri qatysty.

Keńes barysynda Almaty qalasy ádilet departamenti qyzmetine qatysty jekelegen suraqtar men ádilet, qylmystyq-atqarý júıesi jáne sot aktilerin oryndaý departamentteriniń ózara qatynasy boıynsha suraqtar qaraldy.

R. Túsipbekov Almaty qalasy ádilet organdary men mekemeleriniń jumysy tutastaı alǵanda oń nátıjelerge qol jetkizgenin atap ótti.

Sonymen qatar, Ádilet mınıstri departament basshylarynyń nazaryn keshendi sheshim qabyldaýdy talap etetin birqatar máselelerge aýdartty.

Atap aıtqanda, zııatkerlik menshik, qujattandyrý, azamattyq hal-aktilerin, zańdy tulǵalardy jáne jyljymaıtyn múlikke quqyqtardy tirkeý salasyndaǵy máseleler talqylandy.

Ádilet mınıstri jeke jáne zańdy tulǵalar ótinishterin qaraý boıynsha jergilikti ádilet organdarynyń jumysyn synǵa aldy.

Bıznes úshin ákimshilik tosqaýyldardy azaıtý boıynsha Úkimettiń qabyldap jatqan sharalardy keń jarııalaýda qalalyq ádilet departamenti jumysynyń jetkiliksizdigin atap kórsetti. Mınıstr osy baǵytta Úkimettiń mańyzdy qadamdar jasaǵanyn aıtty.

R. Túsipbekov ádilet organdary usynatyn memlekettik qyzmetter sapasyn kóterý jáne turǵyndarmen jumysty jandandyrý boıynsha qosymsha sharalar qabyldaý qajettigin atap ótti.

Departament basshylary osy baǵyttar boıynsha tapsyrmalar aldy.

Keńes qorytyndysy boıynsha Ádilet mınıstri departament basshylaryna ádilet organdary bólimsheleriniń ózara qatynasyn jaqsartý boıynsha da tapsyrma berdi.