Ádilet mınıstri R.Túsipbekov Májilis depýtattarymen ádilet organdarynyń jumysyn jetildirý máselelerin talqylady
ASTANA. Jeltoqsannyń 25-i. QazAqparat - Keshe, jeltoqsannyń 24-i kúni QR Ádilet mınıstrliginiń Sıtýatsııalyq ortalyǵynda vedomstvo basshysy Rashıd Túsipbekovtyń QR Parlamenti Májilisi Zańnama jáne sot-quqyqtyq reforma komıtetiniń depýtattarymen kezdesýi ótti,
dep habarlaıdy QazAqparat.
Mınıstrliktiń baspasóz qyzmeti atap ótkendeı, kezdesý barysynda ádilet organdarynyń jumysyn jetildirýdiń negizgi aspektileri talqylandy. «Máselen, Ádilet mınıstri depýtattarǵa memlekettik mekeme retinde erekshe statýsy bar Zańnama ınstıtýty qurylatyndyǵyn aıtyp, bul zańnamalyq bastamalardyń ǵylymı pysyqtalýynyń jáne Instıtýttyń óziniń boljaý-taldaý jasaý qyzmetiniń sapasyn arttyratyndyǵyn jetkizdi. Jospar boıynsha Instıtýt kelesi jyldan bastap jumys isteıdi», - delingen baspasóz baıanynda.
Sondaı-aq notarıaldyq jáne qorǵaýshylardyń qyzmetin jetildirý usynystary talqylanyp, notarıýster men qorǵaýshylar kandıdattarynan emtıhan qabyldaıtyn attestatsııalyq komıssııalardyń jumysynyń ashyqtyǵyn qamtamasyz etý úshin, budan bylaı komıssııa músheligine Májilis jáne Senattan bir-bir depýtat, Joǵarǵy sottyń sýdıasy, Ádilet mınıstrliginiń ókilderi men zańger-ǵalymdar qosylatyn bolyp sheshildi.
Sonymen qatar, taraptar sot-saraptamalyq júıeni jetildirý, ózekti quqyqtyq aqparattar men tirkeý qyzmetterine azamattardyń qol jetimdigi máselelerine qatysty pikir almasty.
