Ádilet mınıstri Parlamentke engiziletin zań jobalaryn aıtty
«Úkimettiń zań jobalaý jumystarynyń 2020 jylǵa arnalǵan jospary bekitilgende 17 zań jobasyn ázirleýdi jáne Parlamentke engizýdi kózdedi. Jyl ishinde engizilgen túzetýlerdi eskere otyryp, Jospar 22 zań jobasyn ázirleýdi jáne Parlamentke engizýdi qamtydy. Túzetýlermen 7 zań jobasy engizildi, 2 zań jobasy alyp tastaldy, 2 zań jobasy boıynsha engizý merzimderi aýystyryldy. Memlekettik organdardyń zań jobalaryn engizý merzimderin aýystyrýy Premer-Mınıstr Keńsesi jáne Prezıdent Ákimshiligi basshylyǵymen kelisildi», - dedi mınıstr.
Onyń aıtýynsha, ázirleýshi organdar Úkimettiń zań jobalaý jumystary Josparynyń ýaqtyly oryndalýy, sondaı-aq zań jobalaý qyzmetin tıimdi josparlaý boıynsha barlyq qajetti sharalardy qabyldady.
«Búgingi tańda Úkimettiń zań jobalaý jumystarynyń 2020 jylǵa arnalǵan jospary tolyq kólemde oryndaldy, 22 zań jobasynyń barlyǵy Parlamentke ýaqtyly engizildi», - dep túsindirdi M. Beketaev.
Sonymen qatar ol Úkimettiń zań jobalaý jumystarynyń 2021 jylǵa arnalǵan jospar jobasyna toqtaldy.
«Ádilet mınıstrligi Zań jobalaý qyzmeti máseleleri jónindegi vedomstvoaralyq komıssııanyń múshelerimen birlesip, memlekettik organdardyń usynystary boıynsha Úkimettiń zań jobalaý jumystarynyń 2021 jylǵa arnalǵan jospar jobasyn daıyndady. Jospar jobasy Memleket basshysy jáne strategııalyq qujattarda aıqyndalǵan tapsyrmalar negizinde qalyptastyryldy, onda 25 zań jobasyn ázirleý kózdelgen. Ázirlenýge usynylǵan zań jobalardyń ishinen 2021 jyldyń birinshi jartyjyldyǵynda Parlamentke 13 zań jobasyn, al ekinshi jartyjyldyǵynda 12 zań jobasyn engizý josparlanyp otyr», - dep naqtylady M. Beketaev.
Aldaǵy jyly «Qoǵamdyq baqylaý týraly», «Qazaqstan Respýblıkasynyń bıologııalyq qaýipsizdigi týraly», «Geodezııa, kartografııa jáne keńistiktik derekter týraly» jáne «Áskerı polıtsııa organdary týraly» jańa zań jobalarynyń ázirlenýi eskerilgen.
