Ádilet mınıstri múlik qunyn baǵalaýdyń biryńǵaı memlekettik standarttaryn belgileýdi usyndy
;ASTANA. Qańtardyń 16-sy. QazAqparat /Ernur Aqanbaı/ - Ádilet mınıstri Rashıd Túsipbekov Qazaqstandaǵy baǵalaý qyzmeti naryǵyndaǵy jaǵdaıdy túbegeıli ózgertip, múlik qunyn baǵalaýdyń biryńǵaı memlekettik standarttaryn belgileý qajet dep esepteıdi.
Ol bul usynysyn atalmysh mınıstrliktiń búgingi alqa májilisinde aıtty, dep habarlaıdy QazAqparat.
«Baǵalaý qyzmetterin kórsetý naryǵynda birqatar ózekti problemalar bar. Baǵalaýdyń sapasy men onyń shynaıylyǵy ádiletti synǵa ushyraýda. Osyǵan baılanysty biz atalmysh jaǵdaıdy túbegeıli ózgertý qajet dep esepteımiz. Bul qyzmet tolyqtaı ózin-ózi retteýge kóshpesten buryn, biz munda tártip ornatýymyz kerek», dedi alqada mınıstr.
Onyń sózine qaraǵanda, baǵalaýshylar arasynda básekeni shekteýge yqpal etetin sharttardy joıý jónindegi sharalardy qabyldaý qajet. Sebebi, qarjy ınstıtýttary memlekettik lıtsenzııasy bar nysandardy akkredıtteý protsedýrasyn qoldanady. Nátıjesinde árbir kommertsııalyq bank tek qana óziniń baǵalaýshylarymen jumys isteý múmkindigine ıe bolyp otyr. Bul kepilde turǵan múlikterdi baǵalaýdaǵy esep-qısaptardyń shynaıylyǵyna teris áser etýde. «Tájirıbede mundaı baǵalaýshylar shynaıy emes, bankterdiń laýazymdy tulǵalaryna paıdaly múliktiń qunyn bekitedi», dedi mınıstr.
R. Túsipbekovtyń pikirinshe, osy olqylyqtardyń saldarynan qoǵamda baǵalaýshylar esep-qısapta tapsyrys berýshige paıdaly kez-kelgen qundy kórsete alady degen turaqty kózqaras qalyptasqan. «Sondyqtan baǵalaýdyń biryńǵaı memlekettik standarttaryn belgileý qajettigi pisip-jetildi», dedi mınıstr.
Sonymen qatar, R. Túsipbekovtiń pikirinshe, baǵalaý qyzmetin damytýda keleshekte satyp alý-satý mámileleri týraly aqparattyq qor qurý qajet. «Bul máseleni sheshý baǵalaýshylardyń jumysyn, ýákiletti organdar tarapynan monıtorıng pen baqylaýdy aıtarlyqtaı jeńildetedi», dedi ol. Onyń aıtýynsha, Qazaqstanda jan basyna shaqqanda baǵalaýshylardyń sany AQSh, Ulybrıtanııa jáne Reseıdegi kórsetkishten asyp túsedi.
