Ádilet mınıstri qazaq tilin jetik meńgerý úshin sabaq alyp júr
Atap aıtqanda, búgin Májiliste «Qazaqstan Respýblıkasynyń keıbir konstıtýtsııalyq zańdaryna ózgerister men tolyqtyrýlar engizý týraly» QR Konstıtýtsııalyq zań jobasy tanystyrylǵannan keıin Ádilet mınıstri tilshilerdiń birqatar suraqtaryna jaýap berdi. Sonyń biri mınıstrdiń memlekettik tildi tolyq meńgerýine qatysty boldy.
«Siz qazaq tilinde erkin sóıleý úshin ózińizdi jetildirip, sabaq alyp jatsyz ba? Bizge qashan memlekettik tilde tolyq jaýap beresiz?»,- dep surady tilshiler vedomstvo basshysy Beketaevtan.
«Bir jyldyń ishinde tolyq meńgerip shyǵamyn. Qazir aptasyna úsh ret sabaq alyp júrmin. Aýylǵa barǵan kezde turǵyndarmen, týystarymmen tek qazaqsha sóılesemin. Bul baǵytta jaqsy tájirıbe alyp jatyrmyn»,-dedi mınıstr.
Esterińizge sala keteıik , bıyl qańtar aıynda Parlament Májilisiniń jalpy otyrysy barysynda tilshiler saýalyna jaýap bergen QR Ulttyq ekonomıka mınıstri Tımýr Súleımenov taıaý ýaqytta qazaq tilinde jetik sóıleıtinin aıtqan bolatyn.
Jańadan taǵaıyndalǵan mınıstr jýrnalısterge suhbaty barysynda Máskeýde jumys istegen jyldar ishinde qazaq tilin umytyńqyraǵanyn jetkizgen edi.
«Máskeýde 5 jylǵy qyzmetim barysynda óz ana tilimdi umytyppyn. Biraq ta, alty aıdyń ishinde qaıta meńgerip shyǵamyn», - dedi Súleımenov.
