Ádilet mınıstri Elbasynyń Joldaýynda aıtylǵan negizgi qaǵıdattarǵa arnalǵan keńes ótkizdi
ASTANA. Aqpannyń 23-i. QazAqparat /Jasulan Amanbaıuly/ - Búgin Astana qalasynyń Almaty aýdandyq ishki ister basqarmasynda QR Ádilet mınıstri Rashıd Túsipbekovtiń qatysýymen Elbasynyń 2010 jylǵy halyqqa Joldaýynda aıtylǵan negizgi qaǵıdattardy túsindirýge arnalǵan keńes ótti,
dep habarlaıdy QazAqparat.
Jıynda Ádilet mınıstri ІІB-nyń ujymy aldynda sóz sóılep, elimizdiń ekonomıkalyq sıpattaryna sholý jasady. Memlekettiń daǵdarystan keıingi damýynyń negizgi áleýetti baǵyttaryn aıtyp berdi. Sonymen qatar Elbasynyń Qazaqstan halqyna Joldaýynda aıtylǵan quqyq qorǵaý júıesiniń vedomstvoishilik múddelerin azamattardyń quqyqtary men memlekettiń múddelerin qorǵaýǵa aýdarý mindetterine toqtaldy.
Astana qalasy ІІD-niń bastyǵy Marat Demeýov atap kórsetkenindeı, keńestiń basty maqsaty ishki ister organdarynyń birlese otyryp, Elbasy Joldaýyndaǵy mindetterdi iske asyrý boıynsha is-qımyldardy ózara úılestirý bolyp tabylady.
R. Túsipbekovtyń aıtýynsha, mınıstrliktiń jáne quqyq qorǵaý organdarynyń aldynda QR Prezıdenti N. Nazarbaev óziniń jyl saıynǵy halyqqa Joldaýynda kórsetken kásipkerlik ortany nyǵaıtý, memlekettik qyzmettiń sapasyn arttyrý, quqyqtyq salany ońtaılandyrý jáne quqyq qorǵaý organdarynyń jumysyn reformalaý syndy mindetter tur. Sondyqtan atalmysh maqsattardy oryndaýda vedomstvolardyń jumylyp, birlesken is-qımyl jasaýlary asa mańyzdy ekendigine basa nazar aýdardy.
