Ádilet Qurmetov Álem chempıonatyndaǵy jarysyn aıaqtady
ASTANA. QazAqparat - Germanııanyń Gambýrg qalasynda Bokstan álem chempıonaty ótýde, dep habarlaıdy QazAqparat.
60 kelige deıingi salmaq dárejesinde óziniń alǵashqy aıqasyn Ádilet Qurmetov ótkizdi. Onyń qarsylasy grýzın Otar Eranosıan boldy. Tóreshiler jeńisti biraýyzdan Eranosıanǵa berdi.
26 tamyz kúni qazaqstandyq taǵy eki boksshymyzdyń aıqasy kútiledi . 69 keli salmaq dárejesinde (1/16 fınal) Abylaıhan Júsipov mysyrlyq Valıd Saıd Mohamedpen kúsh synasady (keshki sessııa, 23:00-den keıin). 52 keli salmaq dárejesindegi (1/16 fınal) Azamat Isaqulovqa qarsy Ońtústik Koreıa boksshysy Inkıý Kım shyǵady.
Buǵan deıin habarlaǵanymyzdaı , 25 tamyz kúni sharshy alańǵa alǵashqy bolyp shyqqan 49 kelige deıingi salmaqtaǵy boksshymyz Erjan Jomart gvatemalalyq qarsylasy Maıkl Tele Teleni qapy qaldyrsa, 56 kelide synǵa túsken Qaırat Eralıev te birinshi aıqasyn jeńispen bastady. Eralıev birinshi jekpe-jeginde meksıkalyq Krıstofer Flores Maganany aıqyn basymdyqpen utty.
Álem chempıonatynda úshinshi bolyp rıngke shyqqan 75 kelilik boksshymyz Ábilhan Amanqul da qarsylasy - avstralııalyq Kempbell Somervıldi aıqyn basymdyqpen jeńgen bolatyn.
Sondaı-aq 64 kelige deıingi salmaqtaǵy Bekdáýlet Ibragımov baıraqty dodadaǵy jarysyn jeńispen bastady.
Eske salaıyq, 25 tamyz kúni bastalǵan Bokstan álem chempıonaty toǵyz kúnge jalǵasyp, 2 qyrkúıek kúni márege jetedi. Qazaqstan quramasy barlyq 10 salmaq dárejesinde synǵa túsetin bolady. Olar - 49 keli salmaqta Erjan Jomart, 52 keli salmaqta Azamat Isaqulov, 56 keli salmaqta Qaırat Eralıev, 60 kelide Ádilet Qurmetov, 64 kelide Bekdáýlet Ibragımov, 69 kelide Abylaıhan Júsipov, 75 kelide Ábilhan Amanqul, 81 kelide Erik Áljanov, 91 kelide Vasılıı Levıt jáne asa aýyr salmaqta Qamshybek Qońqabaev.
Jarysqa álemniń 85 elinen 280 boksshy kelgen.
