«Ádilet» aqparattyq-quqyqtyq júıesi iske qosylady
ASTANA. 14 maýsym. QazAqparat - Qazaqstan Respýblıkasynyń Ádilet mınıstrligi jáne Respýblıkalyq quqyqtyq aqparat ortalyǵy Qazaqstannyń ulttyq zańnamasymen on-laın rejımde jumys isteýge múmkindik beretin, jańa, qoǵamdyq mańyzy zor joba - «Ádilet» aqparattyq-quqyqtyq júıesin iske qospaqshy.
Atalǵan mınıstrliktiń málimetine qaraǵanda, «Ádilet» aqparattyq-quqyqtyq júıesi - izdestirý múmkindikteri men yńǵaıly zamanaýı ınterfeısi bar tehnologııalyq keshen. Shapshań jáne logıkalyq navıgatsııa ártúrli daıyndyq deńgeıindegi paıdalanýshylar úshin onda jumys isteýdiń qolaılylyǵyn qamtamasyz etedi. Paıdalanýshy alýan túrli izdestirý múmkindikterin qoldana otyryp, normatıvtik jınaqta jalpy, sonymen birge onyń jeke bólimderinde baǵdarlana alady, sondaı-aq ózdiginen taqyryptyq iriktelim qalyptastyra alady.
Derekter bazasynda memlekettik jáne orys tilderindegi 116 myńnan astam normatıvtik quqyqtyq akti qamtylǵan.
Júıe aqparattyq jınaqta kún saıyn jańarta otyryp, táýlik boıy jumys isteý múmkindigin qamtamasyz etedi.
Ázirlengen «Ádilet» AQJ-si azamattardyń tolyq, ózekti, júıelendirilgen ári tegin quqyqtyq aqparatty alýy úshin yńǵaıly jaǵdaıdy qamtamasyz etedi.
«Ádilet» AQJ-ny www.minjust.kz saıty arqyly paıdalanýǵa bolady.
