Ádildikti sheneýnik kabınetinen izdeıtin ádetten aryla almaı kelemiz - Aıdos Sádýaqasov
NUR-SULTAN. QazAqparat - Ádildikti sheneýnik kabınetinen izdeıtin ádetimizden aryla almaı kelemiz. Mundaı pikirdi Ortalyq kommýnıkatsııalar qyzmetindegi baspasóz máslıhatynda QR Joǵarǵy sotynyń baspasóz hatshysy Aıdos Sádýaqasov bildirdi, dep habarlaıdy QazAqparat tilshisi.
«Sot júıesinde oryn alǵan jańashyldyqtar ózdiginen paıda bolǵan joq. Ol - Ult josparynda kózdelgen reformalardyń logıkalyq jalǵasy. Kez-kelgen jańashyldyqtyń tabysty júzege asýy reformatorlarǵa ǵana baılanysty emes. Ol eń áýeli qoǵamnyń ózgeristerdi qabyldaý deńgeıine baılanysty. «Sóz túzeldi, tyńdaýshy sen de túzel» demekshi, birqatar zańdardy da ózgerttik. Sot korpýsy birtindep jańarýda. Biraq eger siz ben bizdiń zańǵa degen qurmetimiz ózgermese, munyń bári beker. Reformanyń qıyndyǵy da osynda. Búginde qıt etse boldy, joǵary jaqqa, ákimder men mınıstrlerge, tipti Prezıdentke deıin shaǵymdanatyndar kóbeıgen zaman. Biraq, ádildikti sottan emes, sheneýniktiń kabınetinen izdeıtin sol baıaǵy ádetimizden aryla almaı kelemiz», - dedi ol.
Onyń atap ótýinshe, Ata zańymyzǵa sáıkes, elimizde sot tóreligin tek sot qana atqarady. Eshqandaı organ nemese laýazymdy tulǵa sýdıa qyzmetin atqara almaıdy. Sot isine qandaı da bir aralasý zań boıynsha jaýapkershilikke alyp keledi. Soǵan qaramastan, naqty sot isin jelige jazyp, talqylaý sánge aınalyp barady.
«Biraq áleýmettik jeli tek shyndyqtan turmaıdy. Muny sizder jaqsy bilesizder. Munda taza faktiden góri emotsııa basym. Keıbireýler ózin sottyń qurbany retinde sıpattap, el-jurttyń aıanyshyn týdyrady. Mundaı jazbalardy oqyǵan adam sot isimen tanyspasa da, sottyń sheshimine qatysty bir jaqty pikir jazyp, syn aıtady. Biz, árıne, synnan qashpaımyz. Eń bastysy, syn shyn bolýy kerek. Degenmen, Feısbýk pen Instagram esh ýaqytta sot protsesin aýystyra almaıdy. Sot sheshimimen kelispegen adam kelesi satyǵa júginýi qajet. Qarap otyrsaq, osynaý qarapaıym qaǵıda saqtala bermeıdi»,- dedi Joǵarǵy sottyń baspasóz hatshysy.
Aıta keterligi, baspasóz máslıhatynda QR Parlamenti Májilisiniń depýtaty, Zańnama jáne sot-quqyq reformasy komıtetiniń múshesi Evgenıı Kozlov, Joǵarǵy Sottyń sýdıasy Elena Maksıýta, Joǵary Sot Keńesiniń múshesi Nurjan Joldasbekov zańnyń ústemdigin qamtamasyz etý jáne sýdıalardy irikteý júıesin jetildirý taqyrybynda sóz qozǵady.
