Ádilbek Jaqsybekovtiń stsenarııi boıynsha túsirilgen jańa fılm 20 qarashada kórermenge jol tartady
ASTANA. QazAqparat - 20 qarashada «Oberon qastandyǵy» shytyrman oqıǵaly fılmi kórermenge jol tartady. Onyń stsenarııin Astana ákimi Ádilbek Jaqsybekov jazǵan. Bul týraly «Qazaqfılm» AQ-nyń Facebooktegi paraqshasynda jazyldy.
«Ǵaryshta Oberon - Ýran spýtnıktarynyń biri. Al Jerde ol Qazaqstan aýmaǵynda ǵana tabylǵan sırek kezdesetin jalǵyz metall. Sybaılasqan sheneýnikter men halyqaralyq krımınalıtet Oberon elementin shetelge shyǵaryp satpaq bolady. Olardyń oıyn júzege asyrýǵa QR Bas tergeý basqarmasynyń polkovnıgi Shyńǵys Arlanov qarsy bolady. Qylmyskerler snarıad qurastyryp, ony Almatynyń ortalyǵynda synaqtan ótkizedi. Element úshin kúreske radıkaldy kúshter de kirisip, jaǵdaı ýshyǵa túsedi. Polkovnık Arlanov pen onyń jaqtastary janyn pıda etse de, lańkesterdiń jolyn kesip, tártip ornatýǵa bel býady», - delingen fılm ańdatpasynda.
Kartına rejısseri Aıdar Batalov bolǵany aıtyldy. Basty rólde jýrnalıst Erdos Tólegenov oınaıdy. Sondaı-aq, kórermender bul fılmde Baýyrjan Ábishev, Ǵanı Quljanov, Ádil Esenbolatov, Dýlyǵa Aqmolda, Aınur Nııazova jáne Erik Joljaqsynov syndy akterlerdi kóre alady.
