Ádilbek Jaqsybekov «Rýhanı jańǵyrý» baǵdarlamasyn áleýmettik jeli arqyly ilgeriletýdi tapsyrdy
QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda Ádilbek Jaqsybekov baǵdarlamanyń barlyq baǵyttary boıynsha naqty josparlardyń ázirlengendigin basa aıtty. Onyń atap ótýinshe, endi aqparattyq túsindirý jumystaryna nazar aýdarý qajet.
«Áleýmettik jelide aqparatty súıemeldeý úshin JOO-lar men ǵylymı ortanyń áleýetin barynsha tıimdi paıdalaný qajet. Áleýmettik jelilerde barynsha belsendi jumys júrgizýimiz kerek. Sapaly, qyzyqty kitap kóp bolǵanymen barlyq aqparattar negizinen áleýmettik jelilerde ilgeriletiledi. Ol jaqta biz qanshalyqty belsendi bolsaq, kútken áser de sonshalyqty kúshti bolady», - dedi ol.
«Ǵylymı jáne shyǵarmashylyq zııalylar, JOO ókilderin eksperttik jáne saraptamalyq súıemeldeýge keńinen tartý mańyzdy», - dep qosty komıssııa tóraǵasy.
Sonymen qatar Prezıdent Ákimshiliginiń basshysy oblystardyń jáne Astana men Almaty qalalarynyń ákimderine demeýshiler qarjysyn tartýdy jalǵastyrýdy, keıbir jerlerde bul jumystardy tipti kúsheıtýdi tapsyrdy.
Ádilbek Jaqsybekov Qazaqstannyń qasıetti jerleriniń kartasyna engen nysandardy ınfraqurylymmen qamtamasyz etý máselesine nazar aýdardy.
«Іs júzinde ınfraqurylymsyz, qajetti kólik qyzmetinsiz qadiri ketedi. Qarjy mınıstrligine ákimdermen birlesip, jobalardy qarjylandyrýdy qamtamasyz etýdi, «Týǵan jer» baǵdaralmasynyń bıýdjetin qaraý barysynda qaperde ustaýdy ótinemin», - dedi ol.
