Ádilbek Jaqsybekov Qazaqstan fýtbol federatsııasynyń prezıdentinen ketetinin málimdedi
NUR-SULTAN. QazAqparat – Ádilbek Jaqsybekov Qazaqstan fýtbol federatsııasynyń prezıdenti laýazymyn saılaýdaǵy jańa merzimge qatysýdan bas tartty, dep habarlaıdy QazAqparat tilshisi.
Osy oraıda ol óz úndeýin jarııalap, federatsııa laıyqty prezıdentti tańdaıtynyna senim bildirip, barlyq úmitkerge sáttilik tiledi.
Atalǵan federatsııanyń málimetine qaraǵanda, bıyl 10 aqpanynda «Qazaqstan Fýtbol federatsııasy» qaýymdastyǵy» ZTB saılaý komıtetiniń jıyny ótti.
Osy oraıda Komıtet QFF prezıdenti saılaýyna qaýymdastyq músheleri usynǵan úmitkerlerdiń qujattaryn qarady. Saılaý 2022 jyldyń 28 aqpanynda QFF Konferentsııasynda ótedi.
«QFF prezıdenti Jaqsybekov Á.R. kandıdatýrasy saılaýǵa qatysýdan bas tartýyna baılanysty tirkelmedi», - delingen habarlamada.
Jıyn qorytyndysy boıynsha aldaǵy saılaýǵa kelesi úmitkerler tirkeldi:
- Barmenqulov Ádilet Nazarbaıuly – QFF Atqarý komıtetiniń múshesi, «Qazaqstan Fýtbol federatsııasy» qaýymdastyǵy» ZTB prezıdentiniń keńesshisi;
- Jarylqasynov Erlan Erkinbekuly – «Qazaqstan áýesqoı fýtbol lıgasy» QB tóraǵasy;
- Qanıev Berik Seralyuly – QFF Atqarý komıtetiniń múshesi, «Lancaster Group Kazakhstan» AQ dırektorlar keńesiniń tóraǵasy;
- Lorııa Davıd Grıgorevıch – «Nur-Sultan qalasynyń Fýtbol federatsııasy qaýymdastyǵy» ZTB prezıdenti;
- Orazbekov Qaırat Aıtmoldauly – QFF Atqarý komıtetiniń múshesi, «Qaırat» AFK prezıdenti.
