Ádilbek Jaqsybekov Germanııa delegatsııasymen kezdesti
«Búginde sottardy irikteý jetildirilip, polıtsııa qyzmeti kezeń-kezeńimen qaıta qarastyrylyp jatyr. Kadrlardy qabyldaý jáne daıyndaý tártibi jaqsartylyp, sotqa deıingi tergeý organdary men prokýratýranyń arasyndaǵy jaýapkershilik ókilettikteri ońtaıly bólinýde. Qazirgi ýaqytta Memleket basshysynyń tapsyrmasyna sáıkes bul jumys jalǵasyp jatyr. Sot ádildigi júıesin, quqyq qorǵaý qyzmetin jáne azamattardyń quqyqtaryn qamtamasyz etýdi odan ary jetildirýge baǵyttalǵan usynystar ázirlenýde. Atalǵan salalardyń tıimdi reformalanýyn qamtamasyz etý maqsatynda biz progressıvti álemdik tájirıbege arqa súıeıtin bolamyz», - dedi kezdesý barysynda ol.
Osy rette Ádilbek Jaqsybekov elimizdiń memlekettik organdarynyń birinshi basshylary birqatar shet memleketke baryp, olardyń qylmystyq protsess modelin, sot óndirisin zerdelep qaıtqandyǵyn atap ótti. Máselen, osy jyldyń maýsym aıynda qazaqstandyq delegatsııa Germanııada bolyp, quqyq qorǵaý organdary men sottardyń jumystaryn uıymdastyrý barysymen egjeı-tegjeıli tanysyp qaıtqan.
«Endigi ýaqytta bizdiń shaqyrýymyzben germanııalyq mamandar Qazaqstanǵa kelip, ózderiniń oń tájirıbelerimen bólisýge daıyn. Sheteldik áriptesterimizdiń jáne olardyń úlken tájirıbesiniń arqasynda biz úshin mańyzdy barlyq suraqtarǵa jaýap alamyz dep oılaımyn», - dedi Ádilbek Jaqsybekov.
Óz kezeginde Maındaǵy Frankfýrt qalasynyń bas prokýrory Albreht Shraıber Germanııada prokýratýra qylmystyq qýdalaý organy bolyp sanalatynyn atap ótti.
«Germanııada qylmystyq is júrgizý zańnamasynyń tarıhy 140 jyldan asyp jyǵylady. Bul qylmystyq is júrgizýdiń uzaqmerzimdi qalyptasýy sanalady. Barlyq jerdegideı, árbir zań sáıkesinshe qoǵamdyq ózgeristerge beıimdelýi tıis. Bizdiń qylmystyq is júrgizý kodeksimiz de uzaq jyldar boıy kóptegen ózgeristerge ushyrady», - dedi Albreht Shraıber.
Kezdesý barysynda qylmystyq protsesti uıymdastyrýdyń progressıvti halyqaralyq standarttary, sonymen qatar Qazaqstannyń quqyq qorǵaý júıesin jańǵyrtý jónindegi tásilder talqylandy. Taraptar sotqa deıingi tergeý, prokýratýra organdary men sottyń qyzmet jasaý máselelerinde tájirıbe almasty.