Ádilbek Jaqsybekov elordanyń birqatar medıtsınalyq mekemelerin aralady
Bul týraly elordanyń resmı saıtynda habarlady. Qala basshysy №1 Perınataldy ortalyq bloktarynyń birinde ashylǵan «Shıpager» otbasylyq densaýlyq ortalyǵynda boldy. 250 kelýshige eseptelgen ortalyq 32 myń turǵynǵa, sonyń ishinde 9 myń balaǵa alǵashqy medıtsınalyq-sanıtarlyq kómek kórsete alady. «Shıpager» jaqyn mańdaǵy Prıgorodnyı, Telman, Zarechnyı kentteri men basqa da alabtardyń tirkelgen turǵyndaryna qyzmet kórsetedi.
Sonymen qatar, Á. Jaqsybekov júkti áıelderge, bosanǵan áıelderge, gınekologııalyq naýqastar men jańa týǵan sábılerge qyzmet kórsetetin №1 Perınataldy ortalyqta boldy. Zamanaýı medıtsınalyq qural-jabdyqtardyń kómegimen qajetti protsedýralardy tolyq júrgizý arqyly dárigerler shala týylǵan sábılerge kútim jasaıdy. Jańa medıtsınalyq jabdyqtar ashyq operatsııalarǵa qaraǵanda, aǵzaǵa az aralasýǵa múmkindik beretin az ınvazıvti otalar jasaýdy qamtamasyz etedi, sondaı-aq, ortalyq balanyń damýyndaǵy týa bitken aýytqýshylyqtardy túzetedi.
Astana ákimi №2 qalalyq aýrýhanaǵa da at basyn tiredi. Jalpy aýdany 34 myń sharshy metrge jýyq aýmaqta 23 emdeý-dıagnostıkalyq bólim jumys isteıdi. Joǵary tehnologııalyq jabdyqtaýdyń arqasynda ınterventtik kardıologııa men kardıohırýrgııa engizilip, tabysty qyzmet etip keledi. Az ınvazıvti operatsııalar otadan keıin qalypqa kelý kezeńin tezdetýge jáne asqyný jaǵdaılaryn azaıtýǵa septigin tıgizedi.
Sondaı-aq Astana ákimi №1 qalalyq aýrýhananyń zamanaýı bólemderin aralady. Búgingi kúni bul - joǵary dáldiktegi medıtsınalyq jabdyqtarmen jabdyqtalǵan, jedel jáne josparly tártipte kásibı medıtsınalyq kómek kórsetetin zamanaýı kópsalaly klınıkalyq ortalyq. Aýrýhana 638 orynǵa eseptelgen, onyń quramynda Eýropa, AQSh jáne Japonııa elderinde shyǵarylǵan qondyrǵylarymen jabdyqtalǵan 28 klınıkalyq bólim bar. №1 qalalyq aýrýhananyń erekshelikteriniń biri - aýrýdan keıin aǵzanyń qyzmetin qalpyna keltirý, qaıtalaý jaǵdaılarynyń aldyn alatyn ınsýlt ortalyǵy.
Densaýlyq saqtaý nysandaryn aralaýdyń sońynda ákim 2012 jyldyń jeltoqsan aıynda jańa ǵımaratqa kóshken №2 balalar aýrýhanasynda boldy. Ǵımarat 8 bloktan turady: 5 blokta statsıonar ornalasqan, emhana korpýsy jalpy aýdany 62 myń sharshy metrlik 3 blokty alyp jatyr. Aýrýhananyń tósek qorynyń 75% hırýrgııalyq tósekter quraıdy.
Ádilbek Jaqsybekov Astanada medıtsınalyq nysandardy ashýdyń 2015 jylǵy josparymen tanysty. Atap aıtqanda, bıyl 150 qabyldaýǵa laıyqtalǵan alǵashqy medıtsınalyq-sanıtarlyq járdem ortalyǵyn, sol jaǵalaýdaǵy ambýlatorııalyq-emhana keshenin, Ilınka kentindegi 150 adamdy qabyldaýǵa eseptelgen Otbasylyq densaýlyq ortalyǵyn, onkologııalyq dıspanserdiń jelilik jyldamdatqyshy men psıhohronıkterge arnalǵan emdeý-óndiristik sheberhana japsarjaılaryn paıdalanýǵa berý kózdelgen.
Budan bólek, 250 oryndyq Balalar juqpaly aýrýlar emhanasy (jospar boıynsha paıdalanýǵa berý merzimi - 2015 jylǵy 4 toqsan) jáne 250 oryndyq 150 adamdy qabyldaýǵa arnalǵan Medıtsınalyq-áleýmettik ońaltý ortalyǵynyń qurylysy aıaqtalmaq.
Kóshpeli otyrys qorytyndysy boıynsha Á. Jaqsybekov qalalyq emhanalarda halyqqa qyzmet kórsetý sapasyn arttyryp, kezekti azaıtý jumysyn jalǵastyrýdy tapsyrdy.
