Ádilbek Jaqsybekov Brazılııada ótetin álem birinshiliginiń ashylý saltanatyna qatysady
ASTANA. QazAqparat - Qazaqstan Fýtbol federatsııasynyń prezıdenti Ádilbek Jaqsybekov Brazılııada ótetin fýtboldan álem chempıonatynyń ashylý matchyna qatysady, dep habarlaıdy QFF baspasóz qyzmetinen.
«QFF prezıdenti Ádilbek Jaqsybekov bastaǵan qazaqstandyq delegatsııa San-Paýlý qalasyndaǵy «Arena Korıntıans» stadıonynda ótetin Brazılııa men Horvatııa arasyndaǵy 2014 jylǵy álem chempıonatynyń alǵashqy oıynyn tamashalaýǵa shaqyrtý aldy», - delingen taratylǵan málimette.
Sonymen qatar, delegatsııa quramynda Qazaqstan fýtbol federatsııasynyń birinshi vıtse-prezıdenti Allen Shaıjúnisov pen vıtse-prezıdent Oljas Abraev ta bar.
QFF baspasóz qyzmetiniń habarlaýynsha, qazaqstandyq delegatsııa Brazılııaǵa álem chempıonaty bastalmastan birneshe kún buryn jetip, 10 maýsymda San-Paýlýda ótken Halyqaralyq fýtbol federatsııalary qaýymdastyǵynyń (FIFA) 64-shi kongresine qatysty. 11 maýsymda QFF basshylyǵy ÝEFA Konfederatsııasynyń sharalaryna qatysady.
Brazılııa Federatıvti Respýblıkasynyń Astanadaǵy Elshiliginiń konsýldyq bóliminiń málimetinshe, álem chempıonaty aıasynda QR 227 azamaty týrıstik vıza alýǵa ótinish bildirgen.
Esterińizge sala keteıik, Brazılııada ótetin HH álem chempıonaty 13 maýsymda bastalady. Álemdik birinshilikke irikteý syndarynan súrinbeı ótken 32 myqty qurama qatysady.
