Ádilbek Jaqsybekov áıelder arasyndaǵy bokstan Álem chempıonatynyń jeńimpazdaryn quttyqtady
ASTANA. QazAqparat - Elorda ákimi Ádilbek Jaqsybekov qala ákimdiginiń apparat otyrysynda áıelder boksynan Qazaqstan ulttyq quramasynyń ókilderi Lázzat Kúngeıbaeva men Valentına Halzovany Astanada ótken AIBA Álem chempıonatynda joǵary jetistikke qol jetkizýlerimen quttyqtady, dep habarlady qalalyq ákimdiktiń baspasóz qyzmeti.
Eske salaıyq, dúbirli dodada Qazaqstan óz tarıhynda alǵash ret jalpykomandalyq esepte birinshi orynǵa taban tiredi. Otandyq bylǵary qolǵap sheberleri tórt altyn men eki qola júlde enshiledi. Sonyń ishinde elordalyq eki sportshy jeńis tuǵyryna kóterildi.
«Qala aktıviniń kózinshe Sizderdi shyn júrekten quttyqtaımyn, sportta da, jeke ómirde de jetistikterge jete berýlerińe tilektespin», - dedi Á. Jaqsybekov chempıondarǵa «Qazaqstan Respýblıkasynyń eńbek sińirgen sport sheberi» qurmetti ataǵyn tabystaı otyryp.
Ákim qyzdarǵa otandyq sporttyń tabystylyǵyna úles qosqany úshin alǵys aıtyp, qalada sportty damytý úshin barlyq jaǵdaılar jasalyp jatqanyn, sonyń ishinde elordalyq sportshylardyń turǵyn úı-turmystyq máseleleri sheshilip jatqandyǵyn atap ótti. Sonymen qatar, Astanada ótken álem birinshiliginiń uıymdastyrylýyna joǵary baǵa berildi, ony AIBA halyqaralyq uıymynyń ókilderi de rastady.
