Ádilbek Jaqsybekov Astananyń kóshirilýine qatysty estelikterimen bólisti
ASTANA. QazAqparat - QR Prezıdenti Ákimshiliginiń basshysy Ádilbek Jaqsybekov 1997-2003 jáne 2014-2016 jyldary Astana qalasynyń ákimi bolyp turǵan kezdegi estelikterimen bólisti, dep habarlaıdy QazAqparat.
Onyń aıtýynsha, 1994 jyldyń 6 shildesinde Prezıdent Nursultan Nazarbaev eldiń burynǵy parlamentinde - Joǵarǵy Keńestiń jalpy otyrysynda el astanasyn kóshirý týraly kútpegen usynys jasaǵan.
«Birtalaı adamdar úshin Prezıdenttiń bastamasy túsiniksiz boldy. Ekonomıkada daǵdarys oryn alǵan, ınflıatsııa. Aınalanyń bári kúızelis, kásiporyndar toqtaǵan, jalaqy men zeınetaqylar ýaqytynda berilmeıdi. Mundaı kezde astanany kóshirý týraly sóz qozǵaýǵa bola ma?! Mundaı aýyr mindetti kótere alamyz ba?! Joǵarǵy Keńestiń depýtattary qyzý aıtys-tartystan keıin Prezıdenttiń usynysyna qoldaý bildirdi, biraq olardyń ózderi kóshirýge 30-40 jyl kerek ekenine senimdi edi. Degenmen Memleket basshysynyń kútip otyratyn nıeti de bolmady. Ýaqyt batyl is-qımyldy talap etti», - dep eske aldy Ádilbek Jaqsybekov «Egemen Qazaqstan» gazetinde shyqqan «Astana - Qazaqstan táýelsizdiginiń nyshany» maqalasynda.
Ádilbek Jaqsybekov ondaǵan jyldar ótken soń ǵana qabyldanǵan sheshimniń durystyǵyna kóz jetkenin atap ótti.
«Áıtse de 1994 jyly Prezıdent asa úlken táýekelge bel býdy. Іs júzinde, ol óziniń saıası bolashaǵyn jańa astananyń tabysty bolýymen baılanystyrdy. Aıtpaqshy, astanany kóshirýdi synaı otyryp, barynsha upaı jınaǵysy kelgen túrli aılakerler muny birden seze qoıdy. Olar nemen qorqytpady deısiz bolmaı qoımaıtyn orasan shyǵystardyń kesirinen ekonomıkanyń kúıreýimen de, Astananyń ash qasqyrdaı ulyǵan qysqy aıazymen de, yzyń qaqqan barmaqtaı sary masasymen de. Kóp jyl ótken soń Prezıdentten astanany kóshirýge qalaı batyly barǵany, tópegen syn men túsinbeýshilikke, tipti qarsylyqqa qaramaı, alǵa jyljý úshin sonshama kúsh pen senimdi qaıdan alǵany týraly suradym. Nursultan Ábishuly: solaı isteýge tıis bolǵasyn istedim, óıtkeni el taǵdyryna jaýapty boldym, dep jaýap berdi. Al endi synaý jaǵyn aıtatyn bolsaq... Eshteńe istemeseń - eshkim de synamaıdy. Birdeńeni qolǵa alsań - onda da synaıdy. Sondyqtan eń jaqsysy, bir nárse istegeniń durys. Áıtpese adam degeniń isteı almaı ketken nársesi týraly ómir boıy ókinip ótpeı me», - delingen maqalada.
Ádilbek Jaqsybekov Memleket basshysynyń batyldyǵynyń, batyl prezıdenttik reformalardyń arqasynda, sonyń ishinde astanany kóshirýdiń arqasynda ǵana daǵdarysty eńserip, damýdyń turaqty jolyna túskenimizdi basa aıtty.
«Jańa astana ekonomıkada naqty jaǵymdy alǵa jyljýdy qozǵap jibergen ıin temirlerdiń biri boldy. Qurylys salasy eńse kótere bastady, al onyń sońynan tizbek boıynsha búkil elde basqa da óndirister qarqyn aldy. Myńdaǵan jumys orny ashyldy. Degenmen eń mańyzdysy - Astana halqymyzdyń ózine degen senimin nyǵaıtyp, qanattandyrdy, eldiń jańarýynyń, jańa táýelsiz Qazaqstannyń shynaıy rámizine aınaldy», - dedi ol.
