Ádilbek Jaqsybekov «Astana» fýtbol klýbynyń kemshilikterin atady
ASTANA. QazAqparat - Qazaqstan fýtbol federatsııasynyń prezıdenti Ádilbek Jaqsybekov kásibı fýtbolshylardy daıyndaý jumysyn synǵa aldy. Qazaqstan nemistiń úlgisin tańdasa da, atalǵan ádisteme boıynsha jumys istep jatqan klýbtar baıqalmaıdy, dep xabarlaıdy QazAqparat tilshisi.
«Ashyǵyn aıtý kerek, biz bárin qatyryp turyp salamyz. Biraq keı kezde aıaǵyna deıin jetkizbeı jatamyz. Ǵımarat bar, biraq mamandar jetispeıdi, ádisteme, tájirıbe jaǵy aqsap turady. Máselen, 2012 jyly biz fýtboldy damytý boıynsha Germanııanyń úlgisin negizge aldyq. Dál qazir qaı oblystar ekenin aıtpaı-aq qoıaıyn, biraq aımaqtardyń kóbisi osy jumysqa atústi qaraıdy. «Astana» fýtbol klýby da sonyń zardabyn kórip keledi», - dedi Á.Jaqsybekov Qazaqstan fýtbol federatsııasynyń XVII konferentsııasynda.
Onyń aıtýynsha, «Astana» klýbynyń janyndaǵy fýtbol ortalyǵyna baryp júrgen jastar da, olardyń ata-analary da oıynshylardyń sheberligin shyńdaý men irikteý sharalaryna qanaǵattanbaıdy.
«Aptasyna úsh ret jattyǵýlar bolady eken. Sonyń ózin durys júrgizbeıdi, jastardy oqytpaıdi deıdi. Shyny kerek, eski júıege uqsaıdy. Qazir zaman basqa, ondaı ádis-tásilder júrmeıdi. Osy oraıda klýbtyń prezıdentine aıtarym kóp, osy máselege durys kóńil bólinbeıdi. Kásibı fýtbol ortalyqtary arqyly daryndy jastardy izdeý kerek. Solardan fýtbol sheberlerin shyǵarý qajet qoı. «Astana» fýtbol klýbynyń daıyndyq ádistemesi zaman talabyna saı bolmasa, basqasy týraly aıtýdyń ózi orynsyz shyǵar. «Qaırattan» basqasy kásibı fýtbolshylardy daıarlaý sharalaryna eshkim den qoımaıtyn sııaqty», - dep atap kórsetti Á.Jaqsybekov.
Aıta keteıik, búgingi konferentsııada QFF-nyń «Alǵa, fýtbol! Alǵa, Qazaqstan!» atty jańa strategııasy tanystyryldy. Atalǵan qujatta batyl bir maqsat bar. Ol - fýtboldyń qazaqstandyq stılin qalyptastyrý. Sonyń arqasynda Qazaqstannyń fýtboly barsha álemge tanylady degen jospar bar. Sondaı-aq, jańa strategııada áıelder klýbtaryn arttyrý mindeti belgilenip otyr. Aldaǵy ýaqytta Qazaqstan fýtbol federatsııasy ortanqol legıonerlerden qutylmaqshy. Búgingi konferentsııada úsh mınıstr Qazaqstan fýtbol federatsııasyna múshe bolyp saılandy. Al uıym basshysy Ádilbek Jaqsybekov fýtboldaǵy jemqorlyqpen qalaısha kúresetini týraly aıtyp berdi. 
