Ádilbek Jaqsybekov ádiletsiz tóreshiler men oıynshylardy fýtboldan qýatynyn aıtty
NUR-SULTAN. QazAqparat – Qazaqstan Fýtbol federatsııasynyń prezıdenti Ádilbek Jaqsybekov klýbtar men tóreshilerge úndeý joldap, ádil oıyn prıntsıpterin qatań saqtaýǵa shaqyrdy, dep habarlaıdy QazAqparat tilshisi QFF resmı saıtyna silteme jasap.
Fýtboldan 2019 jylǵy Qazaqstan Premer-lıgasy sheshýshi kezeńge aıaq basty. 28-týrdan keıin týrnır kestesiniń basynda Almatynyń «Qaırat», Qostanaıdyń «Tobyl» jáne Nur-Sultannyń «Astana» komandalary keledi.
Sheshýshi matchtardyń qarsańynda QFF basshysy Premer-lıganyń, Birinshi jáne Ekinshi lıganyń klýbtaryn, sondaı-aq tóreshilerdi ádil oıyn (Fair Play) prıntsıpterin qatań saqtaýǵa shaqyrdy.
«Qoly taza emes komanda basshylary, bapkerler, tóreshiler, tipti fýtbolshylar da, eger bultartpas dálelder tabylsa, fýtboldan qýylady», - dedi Ádilbek Jaqsybekov.
Federatsııa prezıdenti resmı saıystarda oıyn nátıjesine tikeleı yqpal etetin qatelikter jibergen birqatar tóreshi uzaq merzimge qyzmetinen shettetilgenin tilge tıek etti.
«Premer-lıganyń, Birinshi jáne Ekinshi lıga birinshilikteriniń sońǵy matchtaryn Tóreshiler komıteti, Ádil oıyn prıntsıpteriniń saqtalýyn qadaǵalaý komıteti, QFF Ádep komıteti qatań qadaǵalap otyrady», - delingen málimdemede.
