Ádilbek Jaqsybekov 111 oqýshyǵa «Altyn belgi» tósbelgilerin tabys etti (FOTO)
ASTANA. QazAqparat - Búgin Astana qalasynyń ákimi Ádilbek Jaqsybekov «Qazaq eli» monýmenti aldyndaǵy alańda elordanyń 111 mektep túlegin «Altyn belgi» tósbelgisimen marapattady. Olar Ulttyq biryńǵaı testileý nátıjesinde ózderiniń úzdik bilimin dáleldeı alǵan bolatyn.
«Búgin túlekter úshin aıryqsha kún - bul sizderdiń ómirlerińizdegi jańa kezeńniń bastaýy. Sizder jańa óńirge qadam basasyzdar. Biz sizderdi maqtan tutamyz. Eger, ótken jyly «Altyn belgige» laıqtylar 94 bolsa, búginde sizderdiń qatarlaryńyz 111 túlekke jetip otyr. Árıne, munda sizderdiń ustazdaryńyzdyń zor eńbek sińirgeni sózsiz. Elordada bilim berý deńgeıiniń jyldan jylǵa artyp kele jatqandyǵy qýantady. Astana shyn máninde respýblıkada kóshbasshy bolyp otyr», - dedi qala basshysy.
Osy rette Á.Jaqsybekov taıaýda ǵana QR Bilim jáne ǵylym mınıstrligi men Astana qalasynyń ákimdigi arasynda rásimdelgen 2015-2017 jyldarǵa arnalǵan bilim júıesin jetildirýge baǵyttalǵan memorandým elordadaǵy bilim sapasyn arttyrýǵa septigin tıgizetindigin basa aıtyp ótti.
«Astanadaǵy bilim sapasynyń ósimine ınfraqurylymdyq damý tikeleı yqpal etetindigi sózsiz. 17 jyldyń ishinde Astanada 44 mektep salyndy. Bul kóptegen kúrdeli máselelerdi sheshýge óz septigin tıgizdi. Buǵan qosa, aǵymdaǵy jyly 5075 orynǵa eseptelgen jalpy bilim beretin 5 mektep pen mektepterge japsarlas 1050 oryndyq qosymsha ǵımarat salynbaq», - dedi Á.Jaqsybekov.
