Ádilbek Nııazymbetovteı myqty boksshymen kezdesken emespin - Kýbalyq boksshy
ASTANA. QazAqparat - Ádilbek Nııazymbetovteı myqty boksshymen kezdesken emespin. Erteń elordadaǵy «Qazaqstan» sport kesheninde ótetin Búkilálemdik boks serııasynyń 7-shi maýsymynyń sheshýshi aıqasynda «Astana arlandaryna» qarsy shyǵatyn «Kýba qabylandarynyń» boksshysy Hýlıo La Krýs qazaqstandyq boksshy jaıynda osyndaı pikir bildirdi, dep habarlaıdy QazAqparat.
Aıta keterligi, búgin eki komanda boksshylarynyń salmaq ólsheý rásimi ótken bolatyn. Nátıjesinde kýbalyq Hýlıo Sezar La Krýs qarsylasy Arman Rysbekten 150 gramǵa aýyr bolyp shyqty. Shara aıasynda BAQ ókilderi odan Rıo Olımpıdasynyń fınalynda jeńgen Ádilbek Nııazymbetovpen salystyrǵanda erteńgi qarsylasy Arman Rysbekke qandaı baǵa beretindigin suraǵan bolatyn.
«Ádilbek sharshy alańda, onyń ishinde eń iri halyqaralyq týrnırlerdiń sheshýshi aıqastarynda talaı ret judyryq túıistergen boksshy. Sporttyq mansap jolymda kóptegen qarsylaspen kezdestim. Biraq Nııazymbetovti álemniń eń úzdik boksshylarynyń biri retine aıryqsha atap ótkim keledi. Ony Arman Rysbekpen salystyrǵym kelmeıdi. Bul meniń tarapymnan jasalǵan aǵattyq bolar edi. Meniń jumysym - kez kelgen kezdesýde jeńiske jetý úshin judyryqtasý», - dedi ol.
Sonymen qatar ol Rıo Olımpıadasynda Vel Barker kýbogynyń buıyrmaýyna qatysty da óz pikirin bildirdi.
«Shynyn aıtsam, kútken edim. Bul AIBA sheshimi jáne men ony qabyldaımyn. Eń bastysy, Otanyma altyn medalmen oraldym», - dedi Hýlıo Sezar La Krýs.
