Ádilbek Nııazymbetov sharshy alańǵa sáýirde oralady
ASTANA. QazAqparat - Bokstan Olımpıada oıyndarynyń kúmis júldegeri, Azııa oıyndarynyń chempıony Ádilbek Nııazymbetov sharshy alańǵa sáýir aıynda oralady, dep jazady «Alash aınasy».
«Qazir, Qudaıǵa shúkir, densaýlyǵym jaqsy. Almatyda, Ulttyq quramamen birge daıyndyqty bastap kettim. Sońǵy eki-úsh aıda Ońtústik Qazaqstan oblysy Shymkent qalasyndaǵy «Saryaǵash» kýrortynda jatyp emdeldim. Ol jaqta bilikti káris mamany bar eken. Sol maman meniń em-domymdy jasady. Biraq, meniń jaraqatym eki-úsh kúnde jazylyp kete qoımaıdy. Tolyq emdelý úshin biraz ýaqyt kerek. Endi taǵy bir úsh aıdan keıin qaıta tekserýden ótemin. Eger, onyń qorytyndysy jaqsy bolsa, buıyrsa sáýir aıynda qaıta rıngke shyǵamyn», - deıdi Ádilbek Nııazymbetov.
Eske salaıyq, Ádilbek Nııazymbetov ótken jyly Koreıanyń Inchhon qalasynda ótken Azııa oıyndarynda Qazaqstannyń kók týyn ustap shyǵyp, Azııa oıyndarynyń chempıony atandy. «Sary qurlyqtyń» basty dodasynan keıin Ádilbek birden ARV jobasynda baq synaımyn dep sheship, bir kezdesý ótkizdi. Alaıda ol frantsýz boksshysy Metıý Baderlıkke jeńilip qaldy. Sodan soń Ádilbek ótken jyldyń 21 qarashasynda AIBA Pro Boxing (APB) jobasy aıasynda Djozeff Kennedımen qolǵap túıistirýi kerek edi. Biraq, boksshy jaraqatyna baılanysty bul jobaǵa qatysýdan bas tartty.
