Ádilbek Nııazymbetov: Meniń maqsatym - Rıo Olımpıadasynyń chempıony ataný
ALMATY. QazAqparat- Bokstan Qazaqstan ulttyq quramasynyń múshesi, 81 keli salmaq dárejesinde óner kórsetetin bylǵary qolǵap sheberi, aqtaýlyq Ádilbek Nııazymbetov Qazaqstannyń boks federatsııasynyń resmı saıtyna suhbat bergen edi. Onda ol taıaýda Qytaı elinde ótkiziletin lıtsenzııalyq týrnırge daıyndyq barysy jaıynda áńgimeledi.
- Qarsylastaryńyzdyń ishinde qaısysyn erekshe atap óter edińiz?
- Bul týrnırde Rıo Olımpıadasynyń joldamalary sarapqa salynady ǵoı. Sondyqtan, oǵan qatysatyn sportshylar barynsha daıyndalady. Menińshe, qarsylastardyń barlyǵyna birdeı tyńǵylyqty daıyndalý qajet. Bizdi kúrdeli de jaýapty saıystar kútip tur.
- Osy salmaqta óner kórsetetin jas boksshy Álı Ahmetovty sizdiń basty básekelesińizge aınaldy deýge bolady...
- Básekelestik bul qashanda damýdyń belgisi. Ol jańa maqsattarǵa qol jetkizýge yntalandyra túsedi. Menińshe, básekelestik Qazaqstan boksy úshin aýadaı qajet. Qazaqstan ulttyq quramasy sapynda óner kórsetýge laıyqty, jas izbasarlardyń ósip kele jatqany meni qýantady. Negizi, árbir boksshynyń qolaısyz qarsylasy bolady emes pe!? Men úshin qolaısyz qarsylas osy Álı Ahmetov deýge bolady.
- Qazaqstan ulttyq quramasy sapynda óner kórsete bastaǵan jas boksshy Abylaıhan Júsipovke qandaı keńester berer edińiz?
- Abylaıhan jaqsy mektepten ótti. Kóptegen halyqaralyq týrnırlerge qatysyp, tájirıbe jınaqtady. Onyń áleýeti joǵary. Biz óz kezegimizde oǵan jan-jaqty qoldaý, kómek kórsetýge tyrysyp jatyrmyz.
- Aldaǵy Rıo Olımpıadasy jaıynda ne aıtar edińiz? Aldyńyzǵa qandaı maqsat qoıdyńyz?
- Olımpıada bul - aıtýly ýaqıǵa. Erekshe jarys. Bul jerde jetistik kóptegen faktorlardan quralady. Solar ózara úılesim tapqanda jetistik te bolady. Meniń armanym da maqsatym da - Rıo Olımpıadasynyń altyn júldesine qol jetkizý. Olımpıadadan keıingi sporttyq mansabymnyń qalaı jalǵasatyny belgisiz. Biraq, qazir barlyq kúsh-jigerimdi jumyldyryp otyrǵan maqsat - ol, Olımpıadada jeńis tuǵyryna kóterilip, elimizdiń Kók baıraǵyn jelbiretý.
