«Ádil sóz» qory óziniń joǵalýyn ózi uıymdastyrǵan T.Ábıevti «qara tizimge» engizdi

ASTANA. 3 qańtar. QazAqparat - «Ádil sózi» Sóz bostandyǵyn qorǵaý halyqaralyq qory óziniń joǵalýyn ózi uıymdastyrǵan jýrnalıst Toqbergen Ábıevtiń qylyǵyn jol berýge bolmaıtyn áreket dep esepteıdi, dep jazyldy qordyń resmı saıtynda.

«2012 jyldyń 20 jeltoqsany kúni Toqbergen Ábıevtiń joǵalyp ketkendigi týraly dabyldy Qazaqstannyń jýrnalıstik qaýymdastyǵy, otandyq jáne halyqaralyq quqyq qorǵaý uıymdary soqty. Astana polıtsııasy mereke aldyndaǵy júktemege qaramastan ony izdep-tabýǵa óziniń myqty degen qyzmetkerlerin saldy», - delingen saıtta ornalastyrylǵan habarlamada.

«Degenmen, 31 jeltoqsan kúni Ábıev tabyldy. Belgili bolǵandaı, ol óziniń qyzmetine nazar aýdartý úshin ózin-ózi «urlaǵan». Onyń otbasy, dostary jáne áriptesteri ózderin qoıarǵa jer tappaı júrgende ol din aman jaldamaly páterde jasyrynyp otyrǵan. «Ádil sóz» Sóz bostandyǵyn qorǵaý qory Ábıevtiń bul qylyǵyn etıkalyq jáne kásibılik turǵydan jol berýge bolmaıtyn áreket dep eseptep, ony «qara tizimge» engizdi», - dep túıdi qor ókilderi.

Eske salaıyq, 2012 jyldyń 31 jeltoqsany kúni Astana qalalyq ІІD shuǵyl-izdestirý is-sharalarynyń nátıjesinde elordadaǵy páterlerdiń birinen iz-túzsiz joǵalǵan T.Ábıev aman-esendikte tabylǵandyǵyn habarlady.