Ádil Nurǵojın Qazaqstanda venchýrlyq qarjylandyrýdy damytýdyń erekshelikterin aıtty
«Venchýrlyq ınvestıtsııa - barynsha ózgeshe qural jáne álemde ınvestıtsııalardyń ne bári shamamen 1 paıyzy ǵana osynaý naqty salaǵa baǵyttalǵan. Bul táýekeli óte joǵary ınvestıtsııa. Olardy damytý úshin kóp ýaqyt kerek. Biraq, olarsyz jańa ındýstrııa da bolmas edi. Facebook-te, Internet te, Kremnyı alqaby da bolmaıtyn edi. Elimizdiń bul protseske qatysý ne qatyspaý úshin tańdaý jasaýǵa da múmkinshiligi joq. Másele qalaı jyldam, qalaı tez, qalaı tıimdi júzege asyrý tóńireginde bolyp tur. Artta qalyp qoımaý úshin qatysýǵa tıispiz», - dedi ol.
Onyń aıtýynsha, Qazaqstan qazirdiń ózinde bul komponentti damytýda artta qalyp otyr. Osy rette ol Qazaqstanda venchýrlyq kapıtal úshin naqty ne baza bola alatyndyǵyn aıtyp berdi.
«Qazaqstannyń bazalyq ekonomıkalyq salalarǵa negizdelý qajet. Bul: taý-ken mettalýrgııa kesheni, munaıdy qaıta óńdeý, agrosektor úshin barlyq tehnologııalyq múmkinshilikterdi paıdalana otyryp tereń óńdeý jáne elimizde úlken problema bolyp otyrǵan logıstıka. Tehnologııalyq sheshimder ǵana tıimdi bola alady. Al onsyz qazirgi ýaqytta venchýrlyq ındýstrııa jasaý múldem múmkin emes», - dedi spıker.
Sonymen qatar ol Qazaqstandaǵy venchýrlyq qorlardyń tıimdi damýyna qatysty aıtylǵan syndarǵa oraı pikir bildirdi. Onyń aıtýynsha, ǵylymnyń damýy bir sáttik kiris ákelmeýi tıis. Bul bolashaqtyń isi.
«Tehnologııalyq damý ulttyq agenttigine qatysty, granttardy ıgerýge, atalǵan granttarǵa memlekettik salymdardyń tıimsizdigine qatysty óte kóp syn boldy. Bul jerde mynadaı qarapaıym shyndyqty túsiný qajet - Ǵylymı-zertteý ınstıtýtynyń ǵylymı qyzmetkeri nemese joǵary oqý ornynyń professory esh ýaqytta bıznesmen bolmaıdy. Jáne TDUA ǵylym men qoldanbaly zertteýlerdi qoldady. Qoldanbaly zertteýlerdiń naryqqa kóshý protsesi - bul múldem basqa protsess. Al bul jerde bıznesmender qajet. Bul máselermen biz aınalyspaıtyndaı jaǵdaı jasadyq. ıAǵnı, naryqtyq tetikterdi, atalǵan qyzmetpen kún saıyn aınalysatyn kásibı basqarýshy kompanııany tarttyq. Olar kompanııalardy taýyp, olardy ósiredi, olarǵa ınvestıtsııa salady. Odan keıin ony satyp, aqshany qaıtarady», - dedi Ádil Nurǵojın.
Holdıngtiń basqarýshy dırektory qazirgi ýaqytta QazTech Ventures kompanııasynda baıypty transformatsııa júrgizilgendigin, nátıjesinde qyzmettiń barynsha tıimdi baǵytta anyqtalǵanyn aıtty.
«Qazirgi ýaqytta QazTech Ventures shtatyn qysqartty. Buryn onda shamamen 130 adam jumys isteıtin. Olardyń basym bóligi qaǵaz jumystarmen, granttardy ákimshileýmen aınalysatyn. Bul jumystardyń barlyǵynan arylyp, agenttiktiń adamı resýrstaryn 3 ese qysqarttyq jáne 3 naryqtyq quralǵa nazar aýdardyq. Olar: naryqpen birge venchýrlyq qor qurý, ekojúıeniń qazirgi naryqtyq oıynshylaryn qoldaý jáne damý men transformatsııany qalaıtyn tehnologııalyq konsaltıng kompanııa», - dedi ol.
