Ádil Qadyrbekov pen Mırbolat Qurmashevtiń máıitteri Qazaqstanǵa 11 aqpan kúni jetkiziledi

ASTANA. QazAqparat – Túrkııadaǵy jer silkinisi kezinde qaza tapqan Ádil men Mırbolattyń múrdesi 11 aqpanda elge jetkiziledi. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Túrkııadaǵy jer silkinisi saldarynan mert bolǵan Ádil Qadyrbekov pen Mırbolat Qurmashevtyń múrdesi 11 aqpanda elimizge jetkiziledi», - dedi Aıbek Smadııarov BAQ ókilderine arnalǵan baspasóz máslıhatynda.

Sonymen qatar ol Syrtqy ister mınıstrligi Antakııa qalasynda jer silkinisi kezinde úıdiń qıraýy saldarynan qaza tapqan otandastarymyzdyń týǵan-týystaryna kóńil aıtatyndyǵyn jetkizdi.

«Syrtqy ister mınıstrligi mert bolǵandardyń múrdesin otanyna jetkizý úshin barynsha jan-jaqty kómek kórsetetin bolady», - dedi remı ókil.

Esterińizge sala ketsek, Túrkııanyń Hataı provıntsııasyna qarasty Antakıa qalasynda júrgizilgen izdeý jumystarynyń barysynda 9-aqpan kúni tańǵy saǵat 9-da úıindiler astynan eki adamnyń máıiti tabyldy. Onyń bireýi túrkııalyq Qubylaı Keskın bolyp shyqty. Ekinshi múrde - Ádil Qadyrbekovtiki. Ony marqumnyń týystary rastady.

Al búgin Mırbolat Qurmashevtiń denesin qutqarýshylar úıindi astynan alyp shyqqany belgili boldy.