Ádil Ahmetov Prezıdent maqalasy týraly: Ultty alǵa jeteleıtin bastamalar bar

NUR-SULTAN. QazAqparat – Prezıdenttiń «Abaı jáne HHІ ǵasyrdaǵy Qazaqstan» atty maqalasynda ultymyzdy alǵa jeteleıtin mańyzdy bastamalar kóterilip otyr. Bundaı pikirdi Túrki keńesi Aqsaqaldar keńesiniń múshesi, túrkolog, professor Ádil Ahmetov aıtty, dep habarlaıdy QazAqparat tilshisi.

«Memleket basshysynyń «Abaı jáne HHІ ǵasyrdaǵy Qazaqstan» atty maqalasy óte tarazylanǵan, tereń taǵylymdy maqala bolyp shyǵypty. Óıtkeni bul jaı ǵana quǵaq sóz emes, Abaıdy tereń zerttep, zerdelegen. Ult sanasynyń jańǵyrýyna baılanysty Abaı bir ǵasyr buryn barlyǵyn tyńǵylyqty aıtyp ketken. Sonyń barlyǵyn Qasym-Jomart Kemeluly naqty mysaldarmen tııanaqtap, dáleldep jazypty. Osy oraıda Abaıdyń shyǵarmalary ulttyq sanany saqtaýdyń, jańǵyrtýdyń naǵyz ózegi bolý kerek degen oı tur arǵy jaǵynda», - dep toqtaldy Ádil Ahmetov.

Osy oraıda ol Prezıdenttiń Abaıdy túsinip, zerttep ári taǵylym ala otyryp oqý kerek degen úndeýine barsha qoǵam nazar aýdarý kerektigin atap ótti.

«Pedagog mártebesine de erekshe ekpin qoıylyp otyr. Qazirgi kezde bul baǵytta ońtaıly qadamdardy baıqap otyrmyz, ıaǵnı ustazdardyń eńbekaqysyn kóterý, artyq jumystan bosatý, yntalandyrý sharalarymen qamtý sekildi qajetti jumystar iske asyrylýda. Bul turǵyda Memleket basshysy saladaǵy kemshilikterdi joıýǵa aıryqsha ekpin qoıyp otyr. Munymen qosa, Qasym-Jomart Toqaev maqalasynda til úırenýge qatty mán berilgen», - dep túsindirdi professor.

Sonymen qatar Á. Ahmetov Prezıdenttiń popýlıstik ıdeıalarǵa qatysty aıtqan pikirine toqtaldy.

«Memleket basshysy álemniń túkpir-túkpirinde tek jalań urandar arqyly bılikke jetkisi keletin popýlıster týraly pikirin bildirdi. Bul másele eshqandaı jaýapkershiligi joq, synaýǵa áýes adamdarǵa qatysty bolyp otyr. Osy oraıda popýlızmnen saq bolýymyz kerek, ıaǵnı bul teris tendentsııa ǵoı»,- dedi belgili túrkolog.

Ǵalymnyń atap ótýinshe, Prezıdenttiń qazaqtyń bitim-bolmysyn, mádenıetin shetelge Abaı arqyly tanytý bastamasy óte mańyzdy.

«Jalpy, Qasym-Jomart Toqaev óz maqalasynda mańyzdy taqyryptardy qamtyǵan. Bul tyńǵylyqty saralanǵan maqalany árbirimiz oqyp shyǵýymyz kerek dep olaımyn. Osy oraıda ultymyzdy alǵa jeteleıtin jaqsy úderis bastalǵaly turǵanyn ańǵarýǵa bolady. Sondyqtan Prezıdent bastamalaryna ózim rıza bolyp otyrmyn», - dedi Ádil Ahmetov.

Aıta keteıik, Qasym-Jomart Toqaevtyń «Abaı jáne HHІ ǵasyrdaǵy Qazaqstan»

atty maqalasy «Egemen Qazaqstan» basylymynyń búgingi sanynda jarııalandy.

Foto: egemen.kz